不必着意求佳境，自有奇逢應早春。美股唔妥，美國公司做數問題滿城風雨，IBM散5巴仙，《亞洲華爾街日報》又話和黃（013）有瞞債情況，諗住港股冇運行。點知李老闆即係李老闆，和黃出聲澄清，股價不跌反升，連帶長實（001）亦有同等銀碼進帳，帶番起個市，恒指埋單反升40點。
和黃升1.25元，和黃Call輪9050只升3仙，9110只升4仙，孖輪都未升得夠，值得追進。想快趣種樹鋸板，買9050，貪佢成交最大。計數買輪，揀9110，數據抵啲。
中信泰富（267）收16.15元，升60仙，恒指成分股中跑第2，輸畀恒地（012）一條馬鬚。成交金額1.18億元，大增1倍，打入金額榜上第9位，好少有。上月由18元碌落嚟，今回有心人打骰，有機會鏟番上17元過外，中信Call輪有得睇。
中信Call輪正路係9037，呢件成交最勁，跟正股上番去，目標價36仙。
行小路，揀9165，11月到期，現價30仙，溢價4.1%，槓桿率5.4倍，數據靚過9037，衰在成交量奀好多。