真係好鍾意留喺香港過年，因為平時就算放假，但做嘢嘅電話仍然響個不停，冇得真正休息，但過農曆年時，大家真係會停晒手，完全唔提做嘢，真真正正得到私人時間，想點就點。
唔使驚冇節目，拜年嘅時候只要聚到幾個人就可以開賭，廿一點、擲骰仔、魚蝦蟹、打麻雀任君喜愛，但多數真正有上落都係喺玩「射龍門」嘅時候。
初頭梗係話細細哋玩吓，但係後來梗係發展到愈玩愈大，愈大就愈容易「撞柱」，所以如果玩「射龍門」，最好都係喺大家未輸到入肉、未起火之前收場，新正頭賭吓錢只係求氣氛，最緊要係喜氣洋洋。
喺屋企玩完「射龍門」，跟住帶埋三個外甥去大球場睇真正射龍門嘅賀歲波。以今年嘅戲碼，有七、八成入座率都其實經已唔錯。
小朋友們雖然未識睇波，但對現場氣氛表現得非常雀躍，加上又屈到舅父請食炸雞、薯條加甜筒，一路食嘢、一路睇波、一路玩搖搖，多料娛樂。
球迷們哪管有小朋友在場，睇波講粗口係必然之事，反正小朋友在日後成長的路途上少不免會接觸粗口，正好趁呢個機會家長輔導一番，讓他們見識吓乜嘢叫做萬人齊聲講粗口。
當播出祖國國歌時，全場球迷自自然然懂得肅立，大銀幕上又有歌詞顯示，幾萬人甩甩漏漏地大合唱，見到連小朋友面上也有莊嚴相，內心真係好感動。