鄉議局噚日初七人日搞團拜，發叔當然最高興同風騷，有乜爭拗都放埋一邊。八方當然唔執輸，同發叔拜年兼𢭃封一百元大利是。
發叔真鬼馬，一邊派利是，一邊叫啲女記者嫁嘅時候記得請佢飲，既然發叔咁坦白，班女行家都唔怕醜，叫發叔介紹啲好男仔畀佢哋。
你估呢位新界皇點講？佢真係推薦啲自己友畀女記者，話會介紹啲村長畀佢哋識，村長好處就多啦，至少有屋，即係有瓦遮頭，呢樣最重要，佢重教啲後輩，以前鄉下人嫁女有三個條件，要有屋、有田同有牛，不過今日梗係唔同啦。
講兩講，發叔重大爆自己鍾意日本女星菜菜子，話晚晚都追《大和撫子》片集，又話菜菜子最後諗通，搵老公唔一定要有錢，所以嫁咗畀個窮小子。發叔咁in，真係邊個都估唔到，佢重猛讚菜菜子靚女，唔知發嫂會唔會呷醋。
喺旁邊嘅呂孝端終於唔忍得，話識咗發叔三十三年，佢年年增值，真係唔簡單。
﹙圖﹚發叔噚日團拜好風騷，叫班女記者嫁嗰時請佢飲。
E-mail：