周星馳媽咪喺大年初五請星仔公司一班員工食飯，星媽非常識做，一坐低每人派咗封大利是。聽講田雞佢哋收到封利是後，好快就知道原來星媽出手闊綽過星爺，星媽每封利是係五百大元。
至於星爺封幾多錢利是，佢哋班師兄弟就唔想多講，不過馮仁昭聽講係一百蚊。星爺公司啲員工都話星媽對佢哋好好，每年總會請佢哋食幾餐飯。
不過又唔可以話星爺孤寒，只不過佢同星媽使錢方法唔同，佢早排去咗瑪麗醫院探啲癌病兒童時，都帶咗好多封利是，派畀啲病童，又經常私下去醫院送禮物畀佢哋。
香港影評人協會第七屆金紫荊獎，提名名單會喺今日公布，聽講華仔、星爺、劉青雲會入選角逐影帝。
而梅艷芳、張艾嘉、鄭秀文就有份角逐女主角獎，不過呢個會搞嘅頒獎禮都唔係話好大規模，所以影圈中人都唔係話大比數支持，反而由九大電影屬會搞嘅香港電影金像獎，就比較有代表性。
英皇新人周英傑（Bernard）噚日喺新城電台接受訪問時，宣布佢正式改名為周英杰，其實Bernard至今未正式出碟，佢個名都未有太多人識，所以改名影響唔係咁大。
Bernard話佢早排睇相，相士話佢五行欠金同欠火，杰字有火，而且燒咗嘅木都好旺佢，又同傑一樣音，所以將個傑改成杰。問到幫佢睇相嘅係咪楊受成好信任嘅陳伯？Bernard話：「唔係，不過都係阿伯嚟囉。其實我唔完全信呢啲嘢，既然睇咗就照做囉。」
藍潔瑛又真係幾得意，佢上個禮拜五一個人走咗去西貢四圍行，見佢喺西貢成粒鐘都唔知搞乜。馮仁昭見佢着住一身黃色服裝，一個人喺巴士站附近揹住個大袋行嚟行去，好似漫無目的咁，西貢啲居民都認得佢，所以對佢眼望望，不過藍潔瑛一於少理。
顧紀筠(顧老闆)自從日前被記者發現同新男友夜遊蘭桂坊後，一直都冇承認蜜運中。噚日顧老闆返電視城主持《全線大搜查》，被問到情人節點過時，顧老闆一臉風騷咁話：「今年係我過得最開心、最浪漫嘅情人節，佢安排好一切，真係好甜蜜，自己好似發緊夢咁，不過就唔好咁快醒。」原來今次係顧老闆五年以來，首次拍拖，所以顧老闆十分享受戀愛過程，重相當維護男友，對所有有關男友嘅事都絕口不提呢。