唔好以為挪威前鋒艾法臣同巴基分別係熱刺同列斯嘅大後備就好得閒，查實佢哋不知幾忙，重做咗好多對英國社會好有貢獻嘅事！
事關舊年發生咗九一一事件同埋口蹄病之後，令到英國旅遊業損失慘重，足足唔見咗二十億鎊。我求大俠收到料，話英國嘅旅遊局諗到條好橋嚟振興旅遊業，就係搵班喺超聯搵食嘅歐洲外援球員好似艾法臣同埋巴基等幫手搞宣傳，重預計起碼可以幫英國旅遊業搵到二千萬鎊㖭。
雖則艾法臣同埋巴基係大後備，但佢哋喺家鄉挪威就係superstars，班鄉里見到佢哋猛咁喺電視度宣傳英國，話唔定會去英國走番一轉㗎。唔知香港旅遊業協會又有冇興趣搵喺香港搵食嘅外援球員幫吓手呢？
咪睇世界男飛人美國嘅格連生得大大隻隻，原來好鬼無膽，重話速度滑冰快到得人驚，一定唔會試。但係計我求大俠話，九成係佢輸唔起，畢竟佢都係呢個世界跑得最快嘅人（九秒七九跑完一百米），如果落到滑冰場跑包尾，肯定瘀到爆。
真係服咗「馬家軍」個教頭馬俊仁，佢無論去到邊，都有新聞，好似噚日喺北京馬拉松接力賽，當中國女子隊贏咗日本仔之後，佢老人家就話日本近年喺長跑方面表現有進步，主要係從中國身上偷師得嚟；又話喺釜山亞運會，日本會係中國嘅勁敵。不過，跟住佢又話自己已經有對付日本仔的方法，但又唔肯講係乜，咁佢講咗係咪等如冇講呢！
魔術嗰位超級傷兵格蘭希爾嘅前美式足球明星老竇奇雲最近拉攏咗一班有錢佬，準備用十幾億港紙收購奧蘭多魔術；如果成功，今季提早收咧嘅希爾唔單止可以做太子爺，「印印腳」幫老竇打風流工，重成為北美運動史上第一對「老細球員」父子兵。有老竇「射住」，佢就算打跛腳都唔使憂啦。
唔知大家重記唔記得瀋陽金德呢隊中國甲A球隊呢？佢哋之前吹晒水話簽到阿仙奴嘅法國中場韋拉，衰咗之後俾人笑到面都黃埋。不過，佢哋冇因為咁而氣餒，噚日真係簽咗尼日利亞國腳前鋒阿克布，佢重係尼日利亞攞非洲國家盃季軍嘅功臣之一㖭！今次金德真係冇咗個橙得番個桔，都算係咁囉！