八方前排報過料，盧子健同一眾戰友齊齊再開「世聯集團」公關公司，一於「立足中國，馳騁天下」。噚日佢哋嘅成立酒會，政經界星級人馬都畀面出席，包括行會嘅梁振英、唐英年、王䓪鳴；羅康瑞、李鵬飛等，就連蔡元雲都有到場。
「世聯」喺邀請卡上付上慈善募捐信，呼籲賓客如要送花籃，不如折現，捐畀突破或樂施會中國發展基金，認真識做。難怪「世聯」有九鐵、中電、國泰、新鴻基、和黃等大客，連屋宇署、法援署、職訓局都係佢客仔。
講起政府，負責培訓嘅何安達同八方講，佢哋嘅傳媒技巧課程中，有三分二同學嚟自政府部門，皆因𠵱家嘅記者事事要負責官員對口，一啲工程、技術部門嘅人，不得不上課學習應付傳媒。
何安達舉例，董建華在電視新聞一個soundbite大概十秒半，如果佢講得太複雜，其他內容只得由記者引述，所以面對傳媒，除咗有信心，重要表達清楚。佢重話董生嘅表現改善咗好多，態度更有誠意，何生哋咁識講嘢，唔怪得咁發達啦！
（圖）盧子健（右）嘅「世聯集團」公關公司成立，李鵬飛（左）畀面出席，中為李鑾輝。
E-mail：