自從香港海水污染，流浮山成為歷史之後，要食生蠔便惟有靠外援，好在有各式各樣蠔吧網羅各地靚蠔，讓各地蠔傑有機會公諸同好。最近又有新蠔傑加入行列，在銅鑼灣登場，還以抵食價錢提供各地靚正生蠔，淨食蠔怕唔夠飽？當然還有各款意大利菜作後備，點會獨沽一味咁簡單！
記者：黃婉冰
攝影：陳穎
生蠔拼盤是新張抵食推介，一碟有四款共八隻生蠔兩隻車厘蜆。日本熊本蠔、美國的LongBeach、愛爾蘭Premium、法國FineDeClaire及美國車厘蜆，味道有濃有淡，其中Premium較特別及較少有，其味比美國、澳洲蠔為濃，FineDeClaire則重蠔味及海水味，最好係由淡開始食到最濃味，便能食出每隻蠔的真味。
試味報告：熊本蠔細細隻容易食，愛爾蘭蠔肉質較為爽且蠔味較香，有淡淡海水味，加上價錢的確抵，比起一般蠔吧平二至三成，嗜蠔者必試。
海鮮拼盤集齊美、法、日三國海鮮，海蝦、法國青口、法國海螺、阿拉斯加蟹腳、日本八爪魚、挪威煙三文魚等，海螺用海水及香草灼過，凸顯其鮮甜香味，煙三文魚上的香草、芥辣、黑胡椒經大廚後期製作，可以令魚肉入口更香，保持肉質鮮甜嫩滑。
試味報告：法國海螺最正，螺仔細細，但螺肉出奇地甘甜，煙煙韌韌比普通花螺味鮮，海鮮拼盤樣樣有，想食得多選擇就最啱。
意大利代表菜生牛肉，選用的風乾牛肉購自當地，雖然經風乾處理，但仍然保存肉汁，傳統做法淋上意大利黑醋、橄欖油、巴馬臣芝士，可將牛肉鮮味提升。
試味報告：黑醋分量少少，令牛肉味道酸酸哋，鹹鹹哋，但又保留了牛肉味，分量適合兩個人做頭盤。
餐廳另一主打菜炭燒安格斯牛柳，將厚叠叠牛柳放在有坑的烤爐上炭燒，將肉內多餘脂肪燒出肉外，幾成熟自己話事，但大廚提議最好五成熟，將青椒先用醋、白酒浸過，切粒加入燒肉汁煮，是大廚自創，味道不濃不淡，配牛肉恰到好處，唔會搶去肉味。
試味報告：雖然未至於係最頂級prime牛柳，肉質屬中上，炭燒後將肉汁鎖住，食落都夠嫩滑，青椒汁清香唔辣，無黑椒汁咁濃烈，可以食到牛肉味。
羊鞍一經燒過，肉汁無得走，塗上芥末種子、Dijon芥辣，重未夠，將麵包糠混入蒜茸、香料，將羊鞍重重包圍着，再輕輕一焗，羊鞍變得外脆內滑，配番個蒜香味濃的露絲瑪利燒汁，將多種香料集一身，凸顯羊的味力。
試味報告：羊肉唔羶，有多種香料味，外層比煎羊鞍香脆，亦無咁油膩，肉汁豐富味濃，香料都搶不去。
店名：VeniceOysterBar&Grill
電話：28906648
地址：銅鑼灣怡和街68號百利保廣場地下G-01店
座位：30個
營業時間：中午12時至下午3時，晚上6時至午夜12時。
付款方法：現金及信用卡(Visa，Master，Diners)