澳門警察前日在碼頭毆打香港記者，成件事愈演愈精采，澳門治安警察局噚日凌晨發咗份聲明，講嘅嘢同錄影片段映出來的完全相反，都唔知有冇搞錯，唔通睜大眼真係可以講大話？
話時話，澳門都唔知係咪興秋後算帳呢味嘢，《南華早報》記者張志輝前日在碼頭企埋一邊等行家，順便睇熱鬧，都可以無端端被人捉咗入房困成個鐘頭，出來之後以為冇事，誰不知佢去到澳門新聞中心，打算攞個記者證繼續採訪李鵬行程時，新聞中心竟然話搵來搵去都冇佢嘅申請，搞到佢前日要食白果，噚日朝早再接再厲去問多次。
澳門新聞局噚日終於話佢知，原來在前日朝早，治安警察局通知新聞局，張志輝因為所交的資料不齊全，所以唔可以發證畀佢！係咪真呀？張志輝同《南早》攝影同事一齊交資料，同事交乜佢就交乜，攝影大佬出證完全冇問題，佢又點解會有問題呢？唔通佢得罪澳門差人所以冇運行？
八方住過澳門好多年，好明白當地啲司警特警嘅做嘢方式。進入特區之後，佢哋開明咗少少，但同香港比尚有一段距離。
記得上個月過埠，八方聽當地老友話，澳門經濟肯定有幾年好景，但啲公務員嘅態度，就衰過香港好多。要做東方拉斯維加斯，睇嚟都要再努力，否則人哋點會放心嚟一個「極權」嘅地方？
近年，董建華處處輸畀何厚鏵，如果比較兩地嘅紀律部隊，董建華仍有值得驕傲之處。
E-mail：