特區政府呢輪乜都慢幾拍，乜都話等三月先至講，就算高官問責制咁迫切要上馬嘅項目，負責嘅官員都話唔使趕，又話未收到顧問報告，叫八方再等一會。
見到特區各高官都繡花咁嘅手勢喺度做嘢，八方當然知係等緊老董成功連任嘅消息啦，所以大家識做，一於慢工出細貨，唔好搞亂陣腳。與其係咁，早知八方呢幾個月就唞唞，唔使日日唱特區政府議而不決，根本就有一個hiddenagenda唔講得畀人知。
講開又講，老董一意孤行地要推行具有香港特色的高官問責制，睇嚟誰也擋不了。不過，八方唔知佢老人家有冇預番個位畀「不管部」，等到時有人頂住啲閒雜問題，唔使吓吓要出動大小部長解畫揹鑊。
至於呢個位由邊個去做亦好考人，當然另一個難搵嘅人選，就係接替林D8嘅高官，老董雖然話已經學乖，肯做騷，抱吓BB笑笑口，但始終做佢嘅大公關唔易，林D8謹慎有餘，放料未夠豪爽，呢點眾行家公認，所以佢嘅接班人必須懂得收放自如先至得。
（圖）林D8謹慎有餘，但放料仍未夠豪爽。
E-mail：