米杜士堡近嚟班兵可謂波折重重，繼科倫、約基拒絕加盟後，本來諗住以六百萬鎊過檔嘅土耳其中場艾錫，又突然轉軚，寧願留喺「九降」嘅李斯特城。其實，米杜士堡唔係出唔起錢，點解冇球員肯去呢？計我求大俠話，原因好簡單，米杜士堡衰在「先天不足」囉。米杜士堡位處東北，首先已經冇乜娛樂，好鬼死悶；最慘就係嗰度喺鋼鐵同埋化工業區，搞到啲空氣不知幾差；好似法國國腳卡林保，上季都係因為靚老婆艾麗安娜嫌米杜士堡空氣差，搞到皮膚喎晒，係都要老公轉會。試問咁嘅環境，稍為愛惜身體嘅球員都唔想去「黑煉獄堡」啦！
近日大陸某傳媒猛吹水話北京首鋼嗰件大嚿中鋒巴特爾，即將搭飛機到花旗國加盟NBA嘅丹佛金塊，重講到巴特爾會辰時起程、卯時替金塊出場㖭，直情好似係巴特爾嘅發言人咁；但轉個頭又自刮一嘢，話形勢不明喎，真係佢有佢吹，你有你估囉！
曼聯件荷蘭前鋒雲尼斯達羅喺上周三對英格蘭場友賽，原本着對Nike最新設計嘅MercurialVapor砵落場，點知對鞋鬼咁刮腳，搞到佢最後要着番對舊鞋。唔好話我求大俠諗衰人，都唔知係咪製造商又為咗慳嗰一個幾毫，用埋啲廉價勞工，搞到啲鞋無晒質量保證！
科拿同佢位好兄弟麥馬拿文今季喺球場都唔多如意，科記俾利物浦賣咗去列斯，老麥就因傷冇乜上陣，但這對孖寶喺馬場就威到震。事關佢哋新買嘅德國跳欄馬Bernardon，上周四喺湯頓跳欄賽，幫佢哋攞咗個冠軍。計我求大俠話齋，佢兩兄弟咁好眼光，不如轉行做馬販搵銀，好過喺球場打生打死啦！
韋伯喺明星賽着對勁搶眼嘅銀色波鞋，當時班行家冇個知對鞋乜嘢來頭，經我求大俠明查暗訪後，終於刮到對波鞋原來叫做「噠噠鞋」（DaDashoes），係專門造滑板裝備嘅DamaniDada出品。點解鼎鼎大名嘅韋伯唔揀名牌偏要呢間冇人識嘅公司仔呢？原來韋伯在明星賽開波前五日，做咗呢間公司籃球部嘅總裁囉，就係咁簡單！