新年大概冇新聞，報紙惟有自製話題，派記者到黃大仙去求籤，咁啱得咁蹺，一個求得上籤，另一個求得下下籤，幾平衡噃。嗱，讀新聞系嗰啲七A、六A生，你哋考會考咁叻，先至入到至難入嘅新聞系，入咗去之後，唔使讀書㗎，因為你哋啲前輩就係咁樣造新聞嘅。
《蘋果》求得四張籤，搵專家解釋，信唔信由得你，左丁山亦識得一二，我嘅解法如下：
（一）樓市上上籤——「懷德招親」或「月裏嫦娥」，專家話有志者事竟成，其實嫦娥唔偷靈藥食，就冇得升仙。即係話，香港樓市要回升，先要搵道家煉丹成藥（即係猛橋、好橋），等董特首抄用，樓市先至有希望，董特首係老實人，擔×唔偷食，唔會效法嫦娥做賊嘅。
（二）股市中上籤「韓信棄楚歸漢」，即係先苦後甜最後死。韓信不為項羽所用，轉投劉邦，志得意滿，漢得天下後，韓信唔識急流勇退，下場千古同悲，所以股市照此籤嚟睇係先牛皮靠軟，後大升，再跌到四腳朝天。
（三）香港經濟中上籤「伏羲畫八卦」，八卦冇人睇得明，即係話經濟有如迷霧，得個睇字，點都睇唔通，點敢瞓身投資呢？
（四）《蘋果》讀者運程中上籤「王允獻貂嬋」，王允為誅董卓，獻侍婢貂嬋服侍之，貂嬋再與呂布上牀，搞彎佢哋嘅關係。如果讀者係貂嬋，就要賣肉求成；如果讀者係王允，就要賣女搏老命，點會好呀！