馬年諗住賭番兩場賀歲馬，發吓新年財，發覺要贏錢真係唔容易。年初三入場，直落七場食白果，直至榮智健隻「奧運精神」捧盃至收番多少；第九場本來有機會大報復，因為吼到夏佳理隻大冷門「先河」，可惜陰差陽錯。當日成個紫荊廳內大部分馬迷都係黑口黑面，除咗一個姐姐中咗三重彩又叫又跳之外，其他人相信同八方一樣新年做善事。
噚日冇入場，但重唔抵。點解？因為年初五八方本來約好一班老友團拜，其中一位就係本報馬評家高智能，點知佢老哥去咗深圳唔得閒嚟，當然冇講貼士。噚日散咗場馬主H飛電相告，話高智能在《蘋果》馬經貼中三T，派成四百萬；真係眼都定埋。
印象中，《蘋果》馬經貼士未中過三T，睇嚟佢哋馬年開始行大運，要跟番啲至得。
E-mail：