經紀李來電，問有冇計班到𠵱家通街貼嘅明星大海報？想擺檔年宵時賣。係人都知呢類海報有價，但街邊貼嗰啲全部被打晒窿，並唔值錢，賣得嘅只限冇打窿嘅完璧版，要搵起嚟都幾難。經紀李話唔難，只要識得貼街招公司嗰班人就可搞掂。
搵發達橋王余人祥幫手搭路，佢即刻話：「唔使諗，好難攞，就算有班友都唔會輕易益人，寧願出街自己批。」咁即係點？唔明喎，余人祥開始爆料：「通常唱片公司印好海報後交去畀佢哋貼，海報全部都未打窿，由街招公司嘅人負責打埋窿先攞出街貼，有啲街招公司老闆會抽起部分唔打窿，攞去信和啲明星精品店批，約莫每張25蚊，舖頭賣$80，都幾好執。班負責貼海報嘅𡃁仔點會唔知？佢哋重精，幫海報打窿時故意細力啲，剩番最底嗰20、30張冇打到，趁老闆唔為意又攞去批，同樣去信和啲明星舖，但批價就平過老細，15蚊搞掂。」余人祥話攞海報冇問題，但可能要批價15蚊張，相信有五蚊又係落佢個袋，果然抵佢發達。
主持人：大食Jack
八卦熱報：