今日又有新股漢寶酒樓（228）上市，雖然小初久唔久都會跟親友到漢寶飲茶，但就冇諗過認購佢嘅新股，皆因同類股份金龍船（318）上市後表現有目共睹，故此有戒心。但小初有幾個經紀朋友都話，隻股有人照顧，所以唔會好似金龍船咁失禮。
今次漢寶發行2.5億股，其中1.25億股為新股，7500萬股係舊股，招股價每股20仙，集資淨額2380萬元，真係細細粒容易食。
舊年年尾，小初聽聞負責漢寶嘅幕後炒家，與大凌集團（211）一系同屬一家人，但最近話轉咗旗手，搵咗位財力十足嘅大姐負責。
呢位大姐照顧嘅新股每年都有好幾隻，但就唔係隻隻得，好似上次金龍船咁，原本都係由佢哋揸旗，但最後畀咗另一班人做。今次漢寶又話係大姐揸旗，但小初就懷疑重有其他老闆。
至於原本大凌嘅炒家點解縮沙，小初就問唔到原因。