初四晚去大球場捧港聯場，遇到好多熟人，包括有九倉新樓神之稱嘅黃光耀，佢去年賣「擎天半島」，簡直贏對手一條街。問佢後市點睇？佢話八百呎以下嘅市區樓盤，一定有人要；就算西九龍填海區咁多新盤供應亦唔驚，因為深水埗、長沙灣之類老區，其實隱藏好強嘅購買力。行內人嘅專業意見，八方如實轉述，大家可以參考吓。
同一場合亦見到九倉大公關易志明，問佢李唯仁主席點解中文咁好，度到一句「豐收連年、倉厚屋肥」咁正之賀年句語（見《蘋果》大年初一封面），佢笑到見牙唔見眼，話真係諗咗好耐。八方心想，如果會德豐、九龍倉嘅大本營要掛春聯，就咁加多兩粒字──「會德豐收連年、九龍倉厚屋肥」，就搞掂。
E-mail：