所有人都認為2001年是Twins的天下，校園情歌冧盡少男少女心；查實2001年一樣是B2的天下，不過無人知，唱的Disco歌首首大熱，冧盡Fing頭一族。
半月前，B2的新碟《娥世代》打敗了Twins的賀年專輯《又又生兒》，成了HMV銷量榜冠軍，娛樂版大事報道，沉寂多時的B2一下子成了熱辣人物，為此，Amy與Sandy有話要說：「覺得篇報道有啲小題大做囉！」
記者：陳漢榮
攝影：林栢鈞
澄清，B2這樣說，毫無「寸」之意味。新碟銷量冠軍，當然值得開心，她們也很開心，但未至於大件事到要「攞嚟講」。
記（記者）：有無吐氣揚眉嘅感覺？開心指數幾多粒星？
A（Amy）：（托頭，想一想）開心！但未至於好好好開心嗰隻，講到開心，啲歌迷重開心過我哋，喺網上面恭喜我哋，留言多數係「恭喜打敗Twins」、「永遠支持B2」諸如此類。我開心係因為𠵱家市道唔好都有人買B2嘅碟，講到打唔打敗Twins，老實講無乜感覺，反而歌迷會睇重啲……
S（Sandy）：（搶着說）歌迷覺得大件事啫，啲娛記覺得大件事啫，邊個出新碟都多數會好賣啲㗎啦，無乜嘢值得大驚小怪喎，在我嚟講，新碟好賣，畀到支強心針自己，對公司可以有個交代，肯同B2出大碟，證明公司對B2有信心，就係咁多……
記：心底話？
A與S：（對望一笑）真係一啲都唔覺得吐氣揚眉喎！
A：總之B2嘅努力無白費啦……（反問記者）答得好行呵？
記：你哋話呢？
B2其實很紅，糾正，應該說入夜後的B2很紅，因為她們的《DancingQueen》、《ShootYouDown》、《型男索女》是各大小Disco的熱播歌，是Fing頭一族的至愛。
S：其實我哋啲歌都好受歡迎，不過啲人唔知啫！
記：老實講我好少聽B2嘅歌。
A：未聽過都唔出奇吖，（作Fing頭狀）因為我哋專唱Fing頭歌。
記：D歌之后喎，咁多人落D，啲碟實好賣啦！
A：錯！淨係出碟我哋根本無錢賺，道理好簡單，你諗吓，邊啲人聽我哋嘅歌？蠱惑仔賣嘅都係老翻碟，Fing頭一族買嘅係蠱惑仔賣嘅老翻碟，DiscoDJ打嘅一樣係蠱惑仔賣出嚟嘅老翻碟，我……（咬牙切齒）總之就至憎老翻！
記：人紅先多老翻嘛，你哋應該開心至係。
S：都開心嘅，我哋係跳舞組合，成日去Disco做LiveShow，試過去348Disco，見到個阿伯一路聽住我哋唱，一路跟住我哋跳，個頭亂咁Fing都唔知幾High呀，雖然好搞笑但好有滿足感，望住個舞池幾百人狂嗌狂叫，好似開緊Concert咁。
記：覺唔覺得唱D歌硬係好……
A：Cheap？唔覺得喎，受歡迎就係好歌！
Amy與Sandy本來互不相識，入行之前，Sandy是學生，Amy是個朝九晚五的寫字樓妹，兩人從無綫、大聯盟及新城舉辦的少女歌唱比賽中脫穎而出，組成B2，她們自言不是發明星夢的女孩。
記：你哋算唔算發明星夢嘅女仔？
A：我唔算發明星夢，不過機會擺喺眼前，無理由唔試啫。
S：我更加唔算啦，由細到大都未諗過做明星，只不過鍾意跳舞唱歌，又係嗰句，後生輸得起，撈唔掂咪走囉。
S：我哋鍾意上台表演，但落咗台就唔想有人騷擾，我淨係想有人認同我哋跳舞好，唱歌好。
A：所以我最唔鍾意去剪綵。
S：記者招待會最好唔好搞我。
A：出街最好無人認得我。
記：我諗總有人識欣賞B2啩？
A：有！不過好少，反而初出道，我哋喺酒廊獻唱，唱Live，唱得好，有個日本人當眾醒一百蚊畀我，初頭我唔開心，覺得呢一百蚊Downgrade咗自己，好似當我係無飯開嘅歌女咁，後尾知道呢啲係日本人所謂嘅禮貌，貼士代表一份鼓勵。不過就算做歌女都好，起碼有人識貨，起碼唱得Live多，學曉點執生。
談到執生，Amy試過跳舞跳甩Bra，當眾露點；Sandy試過跳舞跳到流鼻水，整「條」鼻涕「飛」出來，尷尬免不了，但她們懂執生，識撐場，絕對有專業精神。
記：因乜解究跳舞會跳到甩Bra？
A：安全措施做得唔好，一上台我已經Feel到個Top鬆鬆哋，已經就住就住跳，時不時扯好個Top，跳到三分二Part舞度啦，一個大動作之後，我就見到班娛記係咁影我相，我先知發生乜事，但無理由跳跳吓唔跳㗎，忍住撐埋落去，完場返後台即喊。
S：嗰次班娛記算好人，無話衝入後台做訪問，影Amy個喊樣。
A：娛樂版報道都無話我露點博出位，重讚我有專業精神㖭！
S：我哋有專業精神嘛！
記：Sandy你又衰過乜？
S：跳舞流鼻水，成條鼻涕發出嚟，你知啦，嗰日係除夕Show，露天表演，得嗰十度八度，我哋又着咁少衫。唔講唔知，我爭啲俾自己Pat鼻涕跣親㖭呀，好彩班娛記影唔到相，哈！
B2是跳舞組合，形象嘛，美其名是百變，一時玩駁髮辮子頭，一時扮可愛天真美少女，一時爆炸頭配TubeTop，其實是混淆不清，無從定位，她們也承認形象定位是最弱的一環。
記：查實B2個名有乜意思？
S：Babe2，兩個人見人愛嘅女仔咁解……
A：名同形象唔係好夾呵？
記：我又無咁講過……
S：唔怕講喎，有人喺網上面留言，話B2歌就幾好聽，舞跳得唔錯，但兩個都唔係靚女！重有人話我哋不知所謂，九唔搭八㖭。
記：次次着TubeTop，性感博出位？
A：你可以話係，亦可以話唔係。
記：咁即係點？
A：我哋試過密密實實上台表演喎，不過班娛記唔影相之嘛！着TubeTop呢，閃光燈咪猛咁閃囉。
S：（手舞足蹈）我哋係跳舞組合，着TubeTop好睇啲，可以Show到線條美啫。外國啲Artist都可以着胸圍底褲上台表演啦！我覺得只要配合個Performance，就着乜都得。
記：但你哋試過喺銅鑼灣當眾換衫，重話下次會當眾剝褲噃。
S：嗰次係個JointPromotion，幫隻Sell清涼感覺嘅啤酒做Show，事前綵排知道會有人向我哋潑水，帶出SuperCool嘅訊息，去到第二Part，我哋要換衫，場地又無更衣室，趕時間咪即場換囉，查實嗰件係泳衣，啲娛記成個Show唔寫，淨係寫我哋換衫，吹脹。
A：（表情無奈）至於話剝褲，吹水之嘛！嗰次去Disco做完Live，我口多多同個娛記講：「我哋聽日重有Show，到唔到？」佢反問我有乜睇，我咪講笑話除埋褲畀你影囉，點知聽日就大字標題見晒報……
S：總之娛記支筆就好啦。
A：（望記者