一年之計在於春，一日之計在於晨，想今年做事事半功倍的話，一個周詳的計劃絕對唔少得，所謂時間即是金錢，善用時間便是實行計劃的重要一環。不妨於新一年之始買隻靚靚手表提醒自己，如果未有心水選擇的朋友，不如睇吓以下的新款手表介紹，不論Cutie款又或實用款都有齊，實有一隻啱你心水！
記者：黃秋燕
攝影：伍慶泉、陳穎
Model：Angel
睡衣提供：Color
玩具提供：雜物寶寶
來自美國的PaulFrank近排人氣高企，憑着一身Cute到不得了的造型吸引到不少少女們的支持，再加上明星偶像不斷追捧，熱賣梗係意料之內，前排出完膠表款後，家陣到皮帶款隆重登場，巨型表面加埋招牌可愛馬騮仔，重有鮮紅色及粉藍色等搶鏡表帶，夠晒SummerLook，小記至鍾意Boysize男裝表，這隻馬騮表自然成為你的囊中物。
售價：$1,280（Time2）
SWATCH設計的手表一向都會令人有驚歎的感覺，設計新穎之外，色彩配搭亦夠大膽鮮明，而今季最新推出的春夏系列，則完全表達出SWATCH獨有的風格。這隻衣夾型手表便是一大突破，格仔圖案的衣夾上配上表肉夠晒特別，而且可以夾喺衫上當襟針，創意無限，雖然此表冇乜特別的Function，但整隻表的設計意念已經攞滿分。
售價：$370（SWATCH）
預計二月尾推出
唔知大家戴表時有冇試過戴錯方向呢？小記就經常發生這種情況，如果你哋都好似小記咁，不如選擇這款兩面都可以睇時間的立體手表，圓碌碌的立體球形表肉，兩面表面有不同的設計，冇咁單調，加埋鮮橙色膠表帶，可愛得嚟又夠Sharp。
售價：$350（設計廊）
日本一推出即刻賣斷市的SnapWatch，在日本已經相當流行，表繩顏色鮮豔搶眼，除咗可以睇時間重可以當手繩裝飾一下，而且今個春夏流行民族服飾，小記覺得佩戴埋這款同樣有民族Feel的手繩表就最啱喇。
售價：$198（Time2）
成熟打扮的OL可能會覺得太Cute嘅手表唔適合戴返工，不如考慮這款來自法國的CASTELBAJAC手表，藍天白雲的表面即刻有想去郊遊的衝動，如果工作繁忙的你未能即時起行，望望隻表可有望梅止渴的感覺。而另一款則以簡單的線條勾畫出天使的模樣，配上特別的魚絲表帶，夠晒簡單別致！
售價：$980（TWWatch）
這款Kool手表出自香港，但由於多數都會運往外國售賣，因此在香港唔係咁多地方有得賣！藍色半球體表面，面上有多個圓孔，遠望就如一個星球的表面，極具Cyber的味道，而時間就在細細的圓孔上透現出來，外形Cyber得來亦都笨重可愛，大家不妨支持一下香港原創手表。
售價：$280（設計廊）
這款手表產自八十年代，絕不算新表款，但小記一見到便愛不釋手，因為此表有非一般的設計，細心看看，便會發現原來這表是逆時針而行，所有數目字都是由左至右排列，而高飛的雙手便是時針及分針，左右擺動，可愛得嚟又創意十足，看不慣的朋友可能會睇錯時間呢？
售價：$490（A+AD）
這款SWATCH最新手表，表帶棄用傳統的表帶設計，改用圓形膠珠帶，一粒粒的圓珠加上橡筋串成手鏈，配埋透明的塑膠表殼，春日感覺濃厚。如此柔和色彩的圓珠彈性手鏈表完全緊貼你的手腕，穿着一身春裝的同時，唔可以忘記戴埋呢隻手鏈表呀！
售價：$370（SWATCH）
好多女仔都鍾意戴首飾，尤其是手鏈或手鈪，但有時戴太多嘢喺手就非常累贅，不妨考慮這款二合一手表，集手表同手鈪於一身，晶瑩剔透的白色硬膠帶，表面只印上CASTELBAJAC的花花Logo，設計簡約，方便易襯，可惜鈪形表只得一個Size，手細者可能會太鬆唔啱戴。
售價：$360（TWWatch）
這款瑞士天梭手表，外形談不上可愛，但卻是世上首枚觸碰感應時計，你只要輕輕觸碰腕表的水晶面，便可以操作，有響鬧及計算功能，而且手表內置氣壓計、高度計、羅盤指南和溫度計，只需按一按表面，資料即可在液晶顯示上出現，咁突破嘅新科技設計，講求潮流的朋友一定會欣賞。
售價：
$3,950（鋼帶）（Tissot）
$3,750（膠帶）（Tissot）
鍾意運動的朋友可能唔太喜歡得意表款，這隻Nike全球首創弧形跳字表應該係囊中物，Nike一向多計仔，全新推出的具專利特大弧形表面Circadium設計的TriaxSpeed及TriaxStamina便是其中一例，弧形表面配合超薄的表身戴上來更加緊貼手腕，而且液晶體螢幕顯示還可調校十個光暗的對比程度，無論去到邊，都一樣清楚知道時間。
售價：$939（TWWatch）
這款來自美國新牌子OLOGI最新推出的功能表，透明膠表帶冇乜特別，但佢內藏嘅Function就多籮籮，除咗響鬧、世界時間、計時等功能外，喺紀念日前七日重會提醒你，等你唔好忘記重要約會，而且重有神燈顯示，只要㩒吓個掣，十幾句Preset的句子就會隨意顯示出來，幫你做決定，最過癮嘅地方係每逢月圓嘅時候，人狼就會出現喺隻表度，響個不停，搞鬼好玩，配埋個圓球表盒送畀朋友至正。
售價：$150（YourChoice）
店舖資料
Time2（23846073）
旺角潮流特區地庫11舖
TWWatch（23329639）
旺角彌敦道628號瓊華中心U30店
YourChoice（23842003）
油麻地彌敦道538號現時點商場110號舖
A+AD（25738738）
銅鑼灣謝斐道501-515號銀座商場地庫27-29號舖
SWATCH（23763902）
尖沙嘴廣東道30號地下GC舖
設計廊（25844149）
香港會議展覽中心灣仔港灣道1號地下
Tissot
查詢電話：25105170