陳冠希（Edison）喺早前被《忽然1周》影到佢同一名A小姐喺銅鑼灣約會，介入佢同陳文媛（BoBo）嘅戀情之中，導致兩人瀕臨分手，但似乎兩人經已和好如初，重俾人撞見佢哋兩個出雙入對。好似上星期五咁，馮仁昭個老友跟團去日本東京玩，喺傍晚時份同班團友喺裏原宿行街，竟然撞見Edison同BoBo，雖然佢哋兩個當時冇拖手，又刻意一前一後咁行，但明眼人一望就知佢哋兩個去日本拍拖，兼過埋情人節。
馮仁昭個老友同班團友話，明知新年假期有好多香港人去日本旅行，佢哋都咁夠膽去日本拍拖，真係唔到你唔服。記得Edison月頭飛咗去美國進修，原先佢應承咗NBA嗰邊，話會睇佢偶像米高佐敦比賽，點知Edison臨時甩底，原來就係為咗咁嘅原因。
許志安同蘇永康、張衞健老友，係人都知，但呢幾個男人居然可以friend到去酒店開房玩，就唔係個個知喇。馮仁昭知道安仔佢哋平日就各有各忙，難得大家有機會齊齊喺香港，梗係要聚埋飲吓酒，傾吓心事啦，但𠵱家成街都係記者，萬一飲醉酒俾人影咗相就唔係咁好睇，於是安仔佢哋靈機一觸，約埋班老友去酒店開房傾偈，咁就話之醉到不省人事，都唔驚喺人面前出洋相啦。
香港藝人要發展日本市場，咁多年嚟都可以話係一件幾有難度嘅事。𠵱家喺日本真正具知名度嘅香港藝人，除咗已經成為國際影星嘅成龍同埋做過日劇《大話姻緣》女角嘅王菲外，原來張國榮喺日本受歡迎嘅程度，比起陳慧琳更甚。
原來係因為前年張國榮喺日本開演唱會時，佢戴長髮着裙仔嘅扮女人造型豔驚四座，冧到班㗎仔㗎妹fans嗒晒糖囉。
錢嘉樂同日籍巨乳女星酒井若菜合演嘅電影《冇問題2》，喺今個月嘅八號，已經喺日本東京上咗畫，而同期上映嘅電影就有巨片《魔戒》，喺咁強嘅對手底下，雖然《冇》片票房一般，但啲㗎仔就開始注意嘉樂仔，而嘉樂仔亦都因為拍呢部片嘅關係，贏到一班日本fans支持，所以佢都算喺馬年有一個唔錯嘅開始㗎啦。
前港姐楊凱斯四月就會同佢任職教師嘅男朋友拉埋天窗。
早排馮仁昭同佢傾電話，問佢婚禮會唔會大搞時，佢話一切低調處理，結婚當日諗住喺教堂行禮，然後搞個雞尾酒會就算，而且佢諗住到時將親朋戚友送畀佢嘅人情，全部捐去做善事，馮仁昭聽落都覺得好有意義。