股海實戰錄：上落市短炒波幅

上周五馬年首個交易日，趙飛雲趁港股紅盤高開沽貨獲利似乎冇做錯，因為當晚美股顯著下滑，杜指跌1%，納指更跌2%，港股今日跟隨回吐好正路。
上個禮拜只有個半交易日，好友借外圍美股反彈，大挾淡倉。不過上周五港股先高後低，淡友喺11260築起強大防線，收集唔少子彈，今日會借美股回吐進行反攻，考驗好友10780防線。
杜指50日線（現處9926）得而復失，如果短期唔能夠抽番上去，則證明只係假突破，形勢將不利港股。不過港美股市目前大體上仍係上落市，反覆等待突破，目前究竟係向上定向下暫時唔易睇，惟有升近阻力沽貨，跌近支持買貨，短炒波幅。

太協0.66元再上車
趙飛雲上個禮拜五沽咗太平協和（438）及中航興業（1110），準備低位再買過，太協短期支持位0.66元，到價可吸納。中航興業1.42元左右亦可買番。另外亦會昅實滙豐（005）公布業績前嘅動向，小注炒番轉滙豐輪。如果大市跌唔落，亦可以追番些少長實及和黃Call輪，博正股追落後，值博率高啲。