年三十晚食完團年飯，同屋企人「塘水滾塘魚」地賭咗一輪，係時候出街索吓人氣，倒數送蛇迎馬。
原本諗住過江去維園行花市，點知塞極車都未到隧道，鏡頭一轉，諗住去花墟，但係架車喺界限街郁都唔郁，於是軚盤一轉，決定去啟德機場嘅跳蚤市場。
嘩！場面幾熱鬧！攤位唔超過五十檔，遊人唔超過一百人，真係風涼水冷，天地任縱橫。成個市場好似時光倒流十五年，揚聲器有一搭、沒一搭地播放着：「年年歡樂，歡樂年年」。攤位售賣的物品千奇百怪，大部份平到冇譜，點解咁平？因為確實係冇乜用，十蚊三隻嘅大裝餸碟，若然買咗揸住都唔知點行花市。地上放着一蚊一件嘅杯、碗、筷子，擺明係唔知邊間酒樓倒閉嘅剩餘物資，新正頭買夜冷你估真係貪大吉利是。中學生們大聲叫賣鐵車仔，但嗌嚟都冇用，因為根本冇人流，睇嚟學生哥們連零用錢都蝕埋，但都叫做買個教訓，任你入嘅貨品幾咁精明，但係冇人流就嘥氣。
維園花市就真係人山人海，但人就多，幫襯嘅就唔多，因為就算真係想幫襯都迫唔到埋個攤位，但係見到啲攤主大部份笑口噬噬，同隔籬檔嗌得鬥響鬥大聲，自己玩得好開心。
維園花市大大話話有幾萬人，心生一計，下年不如投個攤位畀人唱卡拉ＯＫ，當住幾萬個觀眾唱live，一百蚊唱一首，相信會有唔少有表演慾嘅朋友唱到唔捨得走。