講起琦琦，你會想起成熟大方又高貴，身形高䠷有形格，可能重會諗起SK-II。而私底下的琦琦就最愛得意夠Cute的東西，鍾意BearBear同卡通人物Betty，愛穿牛記白恤衫。除了必用SK-II外，其他喜好我真係估唔到，原來要靚唔係單靠化妝護膚品，童真加開心，先至係最真實的扮靚心得。
記者：梁珮瑜 攝影：陳盛臣
畀你揀，用一萬蚊美金買隻鑽戒戴，還是選擇買精品？琦琦就曾經在美國拉斯維加斯花了約七萬多元港幣，買下一批Betty精品。另外家中亦儲有過百隻熊公仔，隻隻不同各有特色。所以除了老公，相信琦琦至愛就係呢兩個B:Betty&Bear。
琦琦愛中性又瀟灑的打扮，白恤衫與牛仔褲係至愛。有繡花或花邊之類的恤衫，簡單得嚟有Details就最啱心水，而牛仔褲就鍾意佢着得舒服兼襯衫有型，現有超過二百條Jeans，釘片、Vintage、名牌……乜都有。「簡單先會長久，我鍾意Simple嘅款式，亦唔會淨係買一個牌子，要Mix&Match。」
「平時出街唔會化妝，只會畫眉同搽潤唇膏，護膚程序就每日要做好。一日三餐我最重視早餐，一早會飲3杯加檸檬嘅暖水，夏天就飲果汁同食麥片。」琦琦話自己鍾意食嘢唔會戒口，至愛上海菜同麻辣火鍋，所以話天生麗質係唔同，任食唔肥兼皮膚好，真羨慕。