筆者有幸由今天開始，喺本欄跟各位讀者見面；在茶餘飯後講講車，可謂係一件賞心樂事。我亦好希望藉着呢個專欄，能夠跟各位討論一下各樣關於汽車嘅事情同心得，歡迎大家傳真到27420542，同我哋一起談車說事。我亦趁新春伊始，喺呢度祝願大家馬年亨通、事事順境、身體健康。
老編有令，今日先解答積存下來嘅一啲問題：(一)關於街車用嘅Racing水膽及(二)高壓水箱蓋。
所謂Racing水膽，功用係保持散熱水箱內嘅流液溫度喺一定嘅範圍，引擎過熱就會加快水泵運作，令水箱內嘅水流運轉加快，若引擎較為冷卻的話就會泵慢啲。佢的確有一定作用，但對提升性能表現卻無太大作用，而不少落場嘅街版賽車，更係拆除咗水膽㖭。
至於高壓水箱蓋，則可以抗衡水箱內嘅液體，達更高溫度而不致從蓋口漏出，而一般水箱蓋嘅抗壓力係0.9至1.1bar，高壓水箱蓋係1.3bar或以上嘅抗壓力。換上Racing水箱蓋對新車有用，因其水箱新淨無缺口，若舊車用上的話，高溫下嘅水箱冷卻液，都只會喺其他地方漏出，可謂無補於事。若要真正改善冷卻效能的話，就係改用更大嘅冷卻水箱，又或者係加風扇冷卻罷了。
文：陳自齊