啱啱公布咗今年奧斯卡金像獎提名名單，雖然今年「最佳外語片」並冇港產片提名，不過論呼聲較高嘅，法國名片《天使愛美麗》一定有份，而且佢最近重出咗VCD，絕對係近期必睇正戲！另外，剛剛話要封筆嘅史提芬京，今個星期都有新碟出，呢套講述大戰時代三角戀情嘅《飄流之心》，原本要喺三月份先至喺香港戲院上畫，不過𠵱家就率先推出3區DVD優先場，今個新年𢭃咗咁多利是，估唔到咁快就有着落。
記者、攝影：馮彥彰
都唔知係撞啱定係特意咁做，《天使愛美麗》（法國片）嗰頭被奧斯卡提名為最佳外語片，香港呢邊就馬上話推出VCD。
《天使愛美麗》呢套戲可謂來頭不小，佢喺法國本土上畫時，曾經連續四星期穩守法國電影票房冠軍，吸引超過600萬人次入場欣賞，而且，此片更勇奪了歐洲電影大獎嘅最佳電影、最佳導演同最佳攝影等獎項，而女主角柯德莉塔圖，更榮獲法國最有前途女演員獎，來頭絕對不小。
基本上，成套電影都冇冷場，劇情主要講述愛美麗如天使般遊走於各人的生命中，並將歡樂帶給每一戶人家，呢四十「大洋」絕對畀得過。此外，留意導演正是Jean-PierreJeanet，曾拍過《妙不可言》（Delicatessen）同埋《異形4之逆種》(AlienResurrection)，唔係少嘢！
片名：《天使愛美麗》AmelieFromMontmartre)
碟種：VCD
售價：約$40
史提芬京呢頭話唔寫書，嗰頭又出戲猛搵錢，都唔知係信佢「江郎才盡」好，定係「荷包財盡」好！
啱啱喺美國十月先上畫嘅《飄流之心》（HeartsinAtlantis），原本預定喺三月香港戲院上畫，不過唔知點解無端端喺今個星期推出3區DVD版優先場，唔知三月時邊個會去戲院睇呢？
《飄流之心》搵嚟老牌影星又得過奧斯卡影帝嘅安東尼鶴健士做男主角，呢兩個無敵組合，基本上已經係票房保證，唔使懷疑都有一定叫座力。講番套戲，以一般史提芬京嘅驚慄格局，以一老一嫩表達一種超自然時空交錯嘅迷離，再加埋大量充滿危險、懸疑同埋真情橋段，跟原著表達得相差無幾，咁正自然想睇下邊個係導演！原來係拍過《閃亮的風采》（Shine）嘅導演ScottHicks！
DVD片名：《飄流之心》（HeartsinAtlantis）
區碼：3區
售價：約$130
年輕一啲嘅讀者，都可能對呢套《電子世界爭霸戰》唔係幾認識，其實佢可以講話係電腦動畫電影嘅始祖，絕對驗證咗電影嘅歷史，難怪呢套20年前嘅作品，日本玩具商都要為佢20歲生日，出番套Kubrick致敬啦！
至於呢套戲嘅電影動畫大師JeanGiraud，𠵱家更被人追捧至神枱，不過最重要都係佢帶領電腦動畫進入電影中，而且佢所運用嘅假想攝影機同模擬燈光，更是現時大部分電影無不仿效的技術。
另外，講少少隱藏秘密畀大家知，電影入面有唔少場面，都有隱藏着米奇老鼠嘅圖案，非常搞鬼，大家睇戲時不妨留意下。
DVD片名：《電子世界爭霸戰》
區碼：1區
售價：約$180