為咗同啲客打好關係，股票「卜架」喺「新正頭」同客拜年已經成為一個不成文嘅規定，「恭喜發財」及「心想事成」等嘅標準祝賀說話，年初四早上就喺韋衡身邊響個不停。根據韋衡嘅非正式統計，今年「卜架」同啲客講得最多嘅祝賀語仍然係「恭喜發財」同埋「一本萬利」，而「身體健康」及「心想事成」就排喺第二同第三位。
不過韋衡發現一個怪現象，就係無人願意講「財源廣進」同埋「財源滾滾來」等，原因相信係企業去年喺一片瘦身聲下，人人聞「裁員」色變，咁啱「財源」二字同「裁員」又係同音，所以「新正頭」為咗唔想撞板，就完全唔提「財源」有關嘅字句。
雖然韋衡唔係好識風水，不過睇嚟港股今年可能真係有運行。點解韋衡咁講？皆因今年新年期間百業興旺，好多唔肯使錢嘅人都肯使多些少錢，同前幾年嘅氣氛完全唔同。
雖然話香港嘅經濟仍然未掂，但喺美國經濟剛開始復甦下，外圍市場已經急不及待升番上嚟，加埋歐洲嘅經濟數據向好下，今年投資者應該可以有唔錯嘅收穫。
港股喺上周五開市後，亦即刻升番上去11000點水平，雖則未能企喺11000點樓上，不過有好多隻股份都錄到唔錯升幅，尤其喺隻中移動（941）同埋滙豐（005）帶動下，港股要返番11000點根本唔係問題。最重要重係有線人話國內班財金官員正喺度開緊會，睇吓點樣可以向香港開水喉，方便國內投資者之餘，又可以造福香港嘅股市，如果國內今次真係肯放水，相信港股馬年真係可以睇完11000睇16000。