美股大幅反彈後，終現回吐壓力，不過杜指馬步算穩，港股馬年紅盤順利高開。早段好友策馬揚鞭，淡友退避三舍，但好友始終力度未足，淡友喺11260水平築起強大防線，並逐步反攻，帶動現貨升幅收窄，收10961。
恒指雖然未能守穩11000據點，但馬年總算有個好開始，短期好淡料喺10800至11200水平拉鋸，勝負主要睇美股走勢，杜指守得穩50日線（現處9926），港股無大跌風險，兼有力挑戰11200。
趙飛雲馬年亦先攞個好意頭，首先沽出中航興業（1110）及太平協和（438）獲利，正如噚日所講，短線先獲利，候低再買過。
由於港股噚日升近50日線（現處11198）出現阻力，而且按過往經驗，50日線呢類重要關口，好少一衝而破，點都要試二三次先至破關，所以暫時唔買貨住。此外，亦要睇吓杜指能否守穩50日線，先至確定出擊大計。