朋友之子有事入伊利沙伯醫院，住咗幾日出院，因住在沙田，得伊利沙伯轉介去威爾斯醫院做物理治療，以為可以慳番好多交通時間。點知去到威爾斯，第一日只係排期登記，十九號去見物理治療師，再到四月先至可以見到職業治療師，耐唔耐啲呀！朋友個仔喺伊利沙伯醫院日日做緊物理治療，大有進步之際，忽然間窒住條氣，要兩個月之後先至可以獲得治療，唔怪得朋友鬼咁勞氣。
公立醫院排長龍，司空見慣．醫生陳過年前同左丁山講，因價格差異兼夾經濟不景，莫講話基層市民，就算係中產階級以至富豪，都湧去公立醫院，私家醫院遲早玩完，所以到公立醫院求醫，有乜辦法唔等到你急，等到你暈！養和醫院嘅門診部近來裝修到好似酒店Lobby咁靚，與醫院形象唔多相襯，原因係乜，當然一字咁淺，但靚裝修與睇病有乜相關，木宰羊。
醫生陳話以前私立學校靠教育署買位，私立醫院遲早亦要靠醫管局買位，先至可以繼續生存。到時嘅程序就係病人先到公立醫院留醫，公立醫院就會畀佢兩個選擇：（一）排隊尾輪候等位；（二）到私家醫院，價錢打過五、六、七折（諸如此類），立即有房有牀位。於是負擔得起嘅就立即入私家醫院，冇錢嘅唔該你照正常程序排隊。私家醫院已冇法子與公立醫院競爭，將來唔平價賣病房畀醫管局，就會變成艱苦工業。