恭喜，恭喜，小初在馬年第一個交易日向讀者拜年，祝大家今年股運亨通，戰無不勝！
小初今日又想講華德豐（297），皆因過年前經紀黃同小初發咗輪牢騷，佢話全中環都知道華德豐打算批股集資，上個月頭已講到通街都知，話有間外資行會幫佢80仙樓上批股，但過年前，突然傳出話61仙配股，結果華德豐被質到落70仙樓下。
經紀黃話，雖然向佢報料嘅賓架猛saysorry，重話人哋已經即刻叫停批股，但佢覺得好似有人蓄意周圍散播消息，令股價下跌，方便收貨。
小初勸佢無謂咁嬲，皆因華德豐呢一浪由30仙升上嚟，股價已經翻咗一番有多，早上車者已經賺到笑，未必要賺到咁盡。
小初情願等公司債務重組真正完成，同埋衞星業務引入新主要股東落實後，先至會考慮呢隻股。現階段炒下就算，何必咁認真呢？