過年之前，收到好多朋友、讀者嘅電話電郵，詢問易學會會長傅沛基嘅馬年預測。由於傅會長性好雲遊，不欲多言，只能猛咁搵梁玳寧小姐代為尋人。梁小姐覺得以前有人以傅會長之言作為投機炒股指南，畀佢好大無形壓力，所以預備今年唔再訪問傅會長咯。但年近蛇年歲晚之際，梁小姐收到太多友好嘅詢問（包括左丁山代讀者問），佢只得勉為其難，再搵傅會長指點，詳情隨傳真畀友好參閱之外，亦已經刊載於二月七日《明報》。
由於新年截稿期早十零日，左丁山只能喺今日轉述多少，希望冇睇過《明報》嘅讀者唔介意。
馬年利火、水行業如運輸、旅遊，飲食業、金融地產不會立刻好轉，但已「冇咁傷」。
以下日子，可能係香港嘅制度系統爭吵緊張時刻，大家宜注意：（一）四月四日至五月四日；（二）七月七日至八月六日（較嚴重）；（三）十月七日至十一月六日；（四）二○○三年一月四日至二月三日。梁玳寧話，日子如與股市移動相同，可能係巧合。
犯太歲者為生肖屬鼠、馬、雞、兔、牛，以上五種生肖人，宜貼身佩有羊圖的銀牌化解，避開馬和鼠的裝飾品，並須注意飲食和控制情緒。
馬年不佳的方向在正東（五黃）、正南（太歲）、三煞（正北），不佳方位勿擺放木器或水，免招惹病痛官非。以上轉述，如有偏差，皆是左丁山之錯與傅會長及梁玳寧小姐無關。