人氣二人組合Twins工作安排到密麻麻，成日連休息時間都唔夠，今個年初一晏晝，記者喺跑馬地滙豐銀行撞到成員之一嘅蔡卓妍（Charlene），佢一邊㩒錢一邊不停煲電話粥，佢㩒完錢見到記者，就即時向記者拜年。佢話嗰日一早起身，啱啱至做完嘢，但都𢭃咗唔少利是，但令到佢最開心嘅，係有得返屋企瞓吓覺。
問Charlene年初一會唔會去親戚屋企拜年，佢話：「我點都要返屋企瞓一陣先呀，我真係好眼瞓，我啲親戚會放低晒啲利是喺嫲嫲同婆婆度，我淨係去嫲嫲同婆婆度就可以收晒啲利是。」原來對於Charlene嚟講，瞓番一個好覺重要過𢭃利是，呢啲就係成名嘅代價啦！
最近有本周刊話梁朝偉用情深款款嘅眼神望住趙薇，但馮仁昭就覺得一啲都唔出奇，同偉仔有過直接對話嘅異性都知道，佢同親女仔傾偈，不論好醜，對眼都係咁一味放電，呢啲唔知係咪偉仔同異性相處嘅伎倆？只不過趙薇呢個女仔，同偉仔一樣都好鍾意放電，所以佢哋兩個只係棋逢敵手，多過動真情鍾意咗對方。
早前在時裝表演中突然情緒失控嘅Rosemary，係年三十晚嗰日俾阿媽送去港安醫院休息一下，佢阿媽Julie話個女因為唔想見到記者，所以入院時要從秘密通道進入，成功避開傳媒鏡頭。點知Rosemary連出院都一樣咁神秘，馮仁昭收到風，佢入院一日後，趁年初一夜晚冇晒記者時靜靜雞從秘密通道出院，返屋企過年。咁又係，Rosemary已經受感情問題困擾，重要喺醫院過年嘅話又真係慘上加慘。
今個農曆新年檔期，三部賀歲片《嫁個有錢人》、《嚦咕嚦咕新年財》同《天下無雙》鬥得厲害，不過票房走勢始終係Sammi嘅《嫁》片比較勁。馮仁昭三部戲都睇晒，以戲論戲嘅話，其實三部片中，《嫁》片水準麻麻，收得好很大程度因為鄭秀文當旺，反而《天》片就拍得OK喎！至於《嚦》片雖然冇乜劇情，但笑料都幾多，新年睇呢部戲都幾有氣氛。
黃夏蕙成日俾人話係攝石人，早前佢喺某周刊學莫文蔚赤裸上身做封面女郎，又真係幾嚇人。
夏蕙姨噚日喺馬場大吐苦水，自稱俾嗰本周刊key咗個頭落去，重話自己係老實人，咁大年紀，唔會做呢啲嘢。
夏蕙姨重話為表自己清白，遲啲會搵傳媒影埋佢嘅泳衣照展示佢「36、22、34美好身段」咁話。