美股上周五急升118點，觸發淡友喺大除夕半日市，大舉平淡倉過年，恒指半日升313點，收報10832點。
經此一挾，只要噚晚美股走勢偏穩，馬年紅盤高開機會就比較高。大除夕升市相信只係淡友費事持倉過年而平淡倉，並非市場有特別利好因素出現，放完年假後，如果班淡友發覺日本推出嘅官股基金都係冇料到，可能又會再沽過。
辰達永安（1189）周一復牌，宣布向中策（235）發行34.6%新股，集資1.3億元，令中策成為第二大股東，另外再向中策及和黃（013）等發行可換股債券，令辰達變相賣殼畀中策。先前有傳聞，辰達可能成為和黃與北控（392）合資嘅旅遊旗艦股。
不過黑客話，以今次入股辰達嘅組合及形式嚟睇，似乎係一種向辰達融資嘅方式，並非和黃買殼嘅手法。但今次主力出手係陳國強，相信辰達後市重有得炒。辰達周一復牌半日已升近30%，收5.7仙。
呂志和投得澳門賭牌，帶挈嘉華國際（173）勁升22%。照計澳門賭牌冇咩可能會注入嘉華國際，就算要注入都有排搞，照計唔使咁快就炒定先。Cookie話，嘉國後市得唔得，佢就唔係好識睇，不過呂先生投得賭牌後，財源自然滾滾來，屆時佢極有可能引水流入香港股市與樓市，香港唔使開賭都可以得益。
慕詩國際（130）首日掛牌較招股價高26%，收1.26元，不過成交只得2770萬元，屬乾升格局。e莉莎話，此股認購反應唔算熱烈，據聞有好多包銷商要上身，高追要小心。