農曆新年假期結束，市況漸回復正常，但因過節氣氛尚未消散，各人見面都會互相恭賀一番，九龍倉（004）響農曆年間休息3天後，今日再度推售九龍站擎天半島，重準備咗千封利是，不過就唔係畀睇樓人士或買家，而係畀地產代理。
據發展商講，每封利是20元（夾埋都成2萬蚊㗎），主要都係想攞個好意頭，但會唔會有成千個代理去攞咁誇張就唔知啦。擎天半島今日營業時間只係由下午1點到7點，年初五同六兩日就開上午11點到晚上8點。
農曆新年期間，多個發展商如常賣樓，蘭西聽啲發展商講市民睇樓情況同平時周六、日差唔多，可能係冇乜地方去，所以去睇樓。長實（001）何雨盈噚日響紅磡泓景臺示範單位睇場兼同傳媒拜年，一身唐裝打扮，好應景。
另外，新地（016）嘅將軍澳清水灣半島，聽講年初一有成百人響藍田等車睇示範單位，而噚日臨關門前重因為睇樓人士太多，坐滿一部穿梭巴士，搞到有啲住客呻搭唔到車。
蘭西