恭喜發財，恭祝讀者百發百中，長搵長有。
除夕半日市，和黃（013）升1.25元，升得唔夠，會繼續炒落後，和黃Call輪繼續有得去，短炒主角仍然係交投最旺嘅9050。和黃有隻由比聯發行嘅Call輪9110，成交金額只係輸畀9050，大過晒其他同類輪。呢件好超值，屆滿期較9050長10日，槓桿率只係低少少（10.7倍同11.4倍之分），但溢價9.2%，則低過9050達2.9個百分點。
中間落墨，9110溢價多番1.45個百分點（即9.2%變10.65％），都值74仙。𠵱家64仙，偏低14%。
3個禮拜前和黃做75元，當時恒指萬一點。恒指現距萬一好少，和黃遲吓見番75元，9110睇1.10元。
港交所（388）近排落後大市，馬年來臨，港股做好啲，成交大番，港交所有機會跑快多少。
港交所Call輪，要吼吓。6隻輪，兩隻冇成交，交投最多嘅係9137，溢價13.6%制唔過。成交第2位嘅9089，8月到期，現價19.3仙，溢價7.5%，槓桿率5.8倍，最吼得過。