馬年首個交易日，祝各位讀者炒股得心應手發大財。
年假期間，趙飛雲並無蛇王，仍然昅實外圍股市，美股同日股表現相當神勇，杜指更出現突破性走勢，周三晚升破50日線（約9920）阻力後，喺一萬關前徘徊，收9989。杜指回升之勢雖然急，但噚日外圍杜指嘅期指仍向好，升破一萬關。其實只要美股噚晚走勢偏穩，港股馬年紅盤高開易過借火。
趙飛雲蛇年行尾運，中航興業（1110）收購中航澳門，股價大升15%，此外，太平協和（438）亦有好表現，兩隻股中長線都看好，中航興業多一瓣當炒嘅澳門概念，而太協則國內地產潛力優厚，但短炒則不妨吼位先獲利，候低再買，可以賺得盡啲。
美股近期走勢對港股後市會有好大啟示，杜指如果確認突破50日線，港股短期亦會試衝50日線11200阻力。當然，如果杜指只係技術走勢陷阱，港股短期亦轉勢無望。目前睇市宜抱客觀態度，一旦捕捉到轉勢方向，馬年不但可以打響頭炮，更係一個賺錢良機。