第二屆行政長官選舉年初四正式接受報名，呢次全冇對手嘅選舉當然冇人感興趣，因為明知阿董贏梗，但係話雖如此，老董都係要按程序辦事，要攞足最少一百個選委提名，然後去報名參選。
有北京嘅屬意，老董肯定攞到爆燈嘅支持者，除咗民主派班友唔畀面，佢老哥閒閒地攞七百個名，超額交畀胡官，實行高提名票勝出。
當然為咗唔好咁高姿態，阿董班競選智囊已決定唔會第一日交表，但係又唔想太遲，以免耽誤咗大事，同時畀足時間胡官喺提名期查證資料。
今日唔交表，下星期相信就會交，有行家估可能揀初八，因為通勝話呢日好日，宜開市，吉時多，只有三點到五點（申時）係凶時，夠晒時間畀老董做騷。
E-mail：