劉德華年初二與家人打台灣牌，手風順的他食了一鋪九十八番的大三風索子對對胡，先發新年財。今年他更扮財神，祝大家馬年財運亨通，萬事勝意。
今個新年，劉德華希望經濟復甦，扮財神祝大家馬年財運亨通，萬事如意。華仔騎着單車，手揸大叠銀紙的財神造型亦頗特別。
前日年初二，華仔抽了幾小時和歌迷聚會團拜，隨後他和屋企人打台灣牌，他食了一鋪九十八番的大三風索子對對胡，大殺三方。至於贏了多少錢？華仔笑說：「唔好講啦，我哋打得好細，我從來唔會賭身家。阿爸贏輸咪又係我啲錢，哈哈！」拍完賀歲片《嚦咕嚦咕新年財》的華仔，未知是否拍戲時學到幾招必殺技？
日前堪輿學家蘇民峰在電台節目中替華仔睇過相，指他對抗逆境能力很強，華仔認為蘇民峰講得準，因為他真的不怕捱苦，不怕失敗，面對失敗，永不放棄。華仔希望香港人可以像他一樣，不怕困難，只要有鬥志，他相信香港經濟很快會再創高峯。
去年華仔拍的電影票房不俗，上周六他已請員工吃團年飯，還有大抽獎。昨日華仔已出發往德國參與柏林影展，故一早派了開工利是給員工，他說：「派利是係一件好開心嘅事，派利是畀人即係我大吉大利，我絕對唔會肉痛，派得起係一種福分。」而華仔𢭃得最大封的利是，多年來都是向華強夫婦所贈，八千蚊一封，而他父母多數畀一百蚊。