有沒有想過不用到廟宇祈福、家居擺陣都可招福行運？只要你識飲識食，「福」從口入話咁易！這間老字號潮州菜館，設計了一系列「起運菜」，選用具食療效益的材料炮製，據說還配合了玄學的五色起運法設計，吃過後能有助開運。這套菜式主張食得健康，注重內息調理，身子調理得宜，做起事來自然充滿幹勁，久而久之，更令人容光煥發，內外形神俱備，好運氣自然不請自來。
記者：鄭潔兒
攝影：陳穎
ImageGirl:TammanyLau
服裝提供：滿清皇朝
以中鮑翅、赤肉、老雞和上湯燉四、五小時，加即沖鐵觀音茶一同進食。鐵觀音茶味香濃既能去除食物油膩，亦令翅清淡不「𣲷口」。鮑翅補陰滋潤、增強免疫力又健肺助吸收，健康就是無價寶！
試味報告：上湯透出幽幽的茶葉清香，咀嚼翅肉之間齒頰留香，比光喝一杯鐵觀音茶醇香得多了。
要萬事起頭「好」，這個上湯以花旗參、花膠和龍崗雞燉足三小時。花旗參性質溫和、補中益氣，花膠又滋陰補肺，有強身健體和氣當益壯之效。
試味報告：此湯透出濃郁的花旗參香氣，清雞湯鮮中帶甘香，飲落清甜順喉感覺神清氣爽。
正所謂鴻運當頭，紅彤彤的美食不但意頭好又可令人食慾大增。以糖醋煮山楂，配番茄、青椒，雞肉似咕嚕球上粉炸香，色澤明亮，材料配搭更有健脾開胃、補益強身之效。
試味報告：趁熱食，脆卜卜，夾着橙汁酸甜味，絲絲煙韌，山楂粒更是酸咪咪十分醒胃。
想有財有富過肥年就記得食這碟傳統「腰纏萬貫」旺一旺喇！所選用的黃金大蠔豉形大肉厚，恍如鮑魚，加上店方獨門炮製的三燒三焗燒方肉，秘方製法令燒肉去油不膩，以髮菜包裹着，食味香濃意頭好。
試味報告：燒方肉香酥而不膩，蠔豉味道濃郁，絲絲髮菜吸收了蠔豉的濃香，非常入味。
公私友儕之間關係和諧不但令你大受歡迎，更有助平步青雲。將身披銀衣的鯉魚連魚鱗油炸，以薑葱爆香，一打開來濃郁撲鼻，正是隔籬幾枱都聞到。如此氣勢，祝食過「鯉躍龍門」的你早日人氣高企！
試味報告：淡水鯉魚炸至皮脆肉鮮甜，大量薑和葱又可勾出鮮香去魚腥，甚為惹味。
戀愛最是若即若離，時刻作好準備不妨多吃養顏健體食品，有內在美也要外在美！鮮紅番茄與時菜配搭有如紅男綠女。帶子美膚活肌使人容光煥發，配蝦球和雲耳煮成，好睇又好食。
試味報告：帶子和蝦球肉嫩鮮甜、雲耳爽口潤滑，配番茄汁煮時菜帶出鮮甜添開胃。
店名：陳東記
電話：21919928
地址：尖沙嘴樂道32-34號地下及一樓
營業時間：上午11時至下午3時，晚上5時至11時。
付款方法：現金及信用卡(Visa,Master,AE&Diner's)
座位：180個