前日大年初一，記者於港安醫院等候日前入院休養的Rosemary期間，碰上保良局總理樂蓓，原來她於奶奶家中拜年時腸胃炎，於是前往睇醫生。
昨日樂蓓與姊姊再次在醫院出現，問她是否身體不適，樂蓓說：「我腸胃炎差唔多好番晒，今日我係陪我家姐嚟睇醫生。」
樂蓓續道：「本來帶家姐去養和睇醫生，點知間醫院只得兩個醫生駐診，要等成個鐘，之後帶咗佢去聖保祿醫院，點知有過百個病人等緊，所以我咪call咗我個私家醫生去港安醫院幫我家姐睇病。」
另外，前晚Rosemary父親前往醫院探望愛女時，一度向傳媒發火，但至晚上七時許離開時，態度卻明顯軟化，面上展現笑容，不過，記者問他有關Rosemary病情時，他卻不發一言，然後便匆匆乘車離去。昨日記者在港島區港安醫院等候，但卻未見Rosemary父母影蹤，亦未能聯絡其母親。