賭國風雲下集，今日上演。話說廣東社團總會贊助煙花賀歲，霍英東有份主禮，陪住阿董一齊。何鴻燊亦一早到場，雖然兩人冇碰面，但就有料爆。
霍英東未夠八點已離開；佢身邊啲隨從話霍生趕住搭飛機，所以連煙花都唔睇。在場一眾記者問佢賭場分紅唔啱數之事，佢話「明日至講」。講完就走，健步如飛，追都追唔切。
霍生唔講，當然問何生。何生果然不負眾望。佢話：呢個係誤會啫，霍生四十年冇睇過盤數，又冇出聲，如果佢問一定同佢解釋，就算問吓個會計師都得。賭場賺嘅錢要扣起五成半做儲備，例如起澳門機場用咗四十億，起個塔又一億，借畀賭廳又億億聲，有剩先至分紅喎。
賭王重話，唔知邊個同霍生講啲咁嘅數，搞到佢誤會，又否認股東不和──「絕對冇不和，百分之一百好和，只係一個十姑娘唔係，係佢個仔（不和）啫。」咁點解唔趁機同霍老解釋呢？何鴻燊話：「今晚咁多人，唔傾囉，明日佢請我去春茗，到時大把時間傾，畀盤數佢睇」。
原來佢哋約好今日春茗傾偈。不過，今日赤口噃。
E-mail：