今日情人節，由於適逢年初三假期，花店做少好多生意，因為一眾單身淑女唔使收花「示威」；對疲弱零售市道，兩個節日重叠真係唔好彩。
八方數數兩會議員同司局級高官，發覺有十三人單身，其中有五位離咗婚、兩位喪偶，另外六位大概係太過熱愛工作，致誤了佳期。其中最受注意的係財神松，八方前日想同佢拜年，但佢放晒風話要趕做預算案，閉門謝客，如果今日撞到佢……，另一鑽石王老五係楊永強醫生，佢冇阿松咁多緋聞，只係傳過一兩個名。
結咗婚嘅議員中，最浪漫應該係有「愛妻號」之稱嘅鄭家富。佢話今日會去花墟買一紮白玫瑰畀鄭太，然後同佢去睇《怪獸公司》。鄭家富結婚十三年，在浸會讀書時已拍拖，佢話上次送花係送蝴蝶蘭，貪擺得耐，代表長情喎。
另一邊廂，葉國謙就冇咁浪漫，他坦言：「送花嘥錢，畀個心佢咪得囉，畀金咪重好啲；都老夫老妻啦。」阿謙又話，今日早上要為一間小學的中港台棒球比賽主禮，下午就回家陪太太，食餐飯就算。
噚日在煙花現場，亦有人問董太情人節有乜慶祝節目，董太摸吓個頭答話：「乜係情人節咩？唔記得㖭。」跟住就話日日都係情人節。阿董在旁邊聽到，但笑不語。
E-mail：