賓架L即將退休，為在銀行界工作三十年劃上句號。左丁山雖未屆退休之年，不過呢幾年來面對艱難時勢，實在捱得辛苦，亦萌退休之念，可惜自己冇幾千萬股股票在手，惟有繼續捱落去，今日大年初三，或者要到車公廟求籤，睇吓自己幾時先至可以言休。
賓架L話：「女已出嫁，仔已大學畢業，自己照顧自己，兩人睇嚟都唔會返香港，我兩公婆恢復兩人世界，退休亦其時也。」此說亦合道理，趁年紀不算大，活力充沛之際，兩公婆大把時間去環遊世界，玩番兩三年，咪話唔疏芙，唔通要等到真正年老力衰先至退下崗位咩？
鬼佬N聽見賓架L退休，話會教佢打高爾夫球，帶佢去石澳會打波。呢個石澳高爾夫球場，屬石澳居民會，好鬼難加入，星期一至五隨鬼佬N入內，要交六百大元入場，星期六日就唔准入。鬼佬N話：「如果你係女人，我就唔帶得你去，因為會規講明，會員只能帶老婆入會所，唔可以帶女性朋友。」呢條規矩唔錯吖，可以杜絕已婚男性偷會佳人，但如果係單身男士會員，可能有唔方便之處噃。
鬼佬N唔知啫，左丁山從其他渠道就聽到單身貴族高官X久唔久就同一位女性去石澳打波，鬼佬N話：「應該唔得噃。我都見過高官X，不過我唔知佢係單身，我重以為女伴係佢老婆㖭。」原來鬼佬N咁鬼innocent，得閒要講多啲嘢畀佢聽至得。