謝霆鋒同林嘉欣早排去咗法國南部嘅香波堡，拍攝電影《戀愛行星》嘅外景，前後逗留咗七日，雖然霆鋒同嘉欣身在外地，但都不忘同各位讀者拜年。
呢次霆鋒拍戲嘅主景香波堡，已經有超過一百三十年歷史，屬於法國政府嘅文物，霆鋒難得見到咁有法國特色嘅堡壘，忍唔住又攞起陪佢周遊列國嘅相機，影低啲靚景，睇怕霆鋒蓄蓄埋埋啲珍藏照片，第日都可以開個攝影展。
而呢次《戀》片外景，係同一班法國攝製隊合作，有啲法國人開工嗰陣，習慣帶埋部咖啡機同幾袋零食，結果林嘉欣食吓食吓又肥幾磅，返到嚟香港之後，就即刻要嗌減肥。
徐子淇舊年去咗英國讀大學，一向喺香港嬌生慣養嘅佢，過咗嗰邊之後，不停咁病。馮仁昭噚日同子淇傾長途電話，佢把聲好沙，重氣若游絲咁話：「唔知係咪天氣凍，我啲感冒始終都唔清，病完又病，呢個禮拜重周身骨痛，我攰到返唔到學，要請假。」子淇話媽咪一聽見佢病到返唔到學，即刻問要唔要飛過去照顧佢，子淇唔想媽咪頻撲，惟有死頂。
薛家燕（好姨）日前為無綫劇集《皆大歡喜》拍攝一場出浴戲分，反應不俗。
好姨嘅好朋友黎小田即刻打電話畀佢，除咗大讚好姨身材好之外，佢重問好姨可唔可以送張出浴相畀佢珍藏。馮仁昭諗極都唔明，好姨場出浴戲只係露咗少少，黎小田又點睇到佢好身材？
目前喺美國洛杉磯進修嘅陳冠希（Edison），本來應承咗NBA嗰邊，話會出席日前美國費城舉行嗰場NBA全美籃球明星賽，點知比賽前夕，Edison突然臨時甩底，估計Edison多數係嫌飛去費城嗰邊太遠，所以諗住等米高佐敦過幾日去洛杉磯打波，先至去捧偶像場。
除咗Edison之外，Rosemary本來亦同NBA攞咗飛去捧米高佐敦場，但因為佢入咗醫院，所以去唔成。
鄭伊健過年之前忙拍新片《當男人變成女人》，佢喺戲裏面做一個風流成性嘅髮型師。伊健早前去髮型屋拍戲時，為咗扮得維肖維妙，一見到相熟嘅髮型師，就請教佢哋點扮先神似，有個髮型師叫佢只要行為自然，當客人係朋友咁就得，伊健梗係言聽計從啦！