今日係大年初二，祝大家心想事成，萬事如意。無論蛇年運氣如何，各位總希望今年更勝往年，所以每逢車公誕都有很多善信前往車公廟祈求轉運，不過拜車公的蹺妙你哋又知幾多呢？不如大家睇睇堪輿學家楊天命醒你哋嘅3大招數，實行去祈福轉運。未夠盡興的話，大可去春季嘉年華玩轉運機動遊戲，直落再睇煙花，趕走晒啲衰氣，今年行運實行到落腳趾尾啦！
記者：區佩嫦 攝影：伍慶泉
ImageModel：Gary&Cat
鳴謝：華人廟宇委員會、堪輿學家楊天命
講咗3大招數，當然要講番最緊要嘅拜車公步驟，有啲人話要打鼓先，有啲又話要拜天神、地主先，車公廟負責人講出最普遍的程序，等大家唔使到時唔知點做好。
1先拜天地
好多人都會諗，入廟梗係要拜車公先，其實入廟後要先在大殿前祈拜天神和地主，並在這裏上香後才進入大殿。祈福時怕自己唔識講嘢得罪神靈，可以請廟祝代為祈福。
2擊鼓知會神靈
祈福後，當然要順着次序去擊鼓，擊鼓除了有通知神靈外，還有驅邪趕煞的意思，話雖趕煞但打鼓時切忌太急或太用力，打2至3下為限。
3三支線香祭車公
拜完天地，便可以正式入大殿拜祭車公，不過各位要留意，廟宇已規定入殿只可攜帶三支幼身的線香。
4轉運風車
終於到轉風車呢個最後兼最重要嘅步驟，轉風車帶有好運來臨的意思，若想延續上年的好運，應以順時針方向轉動，若想趕走噩運則以逆時針方向轉動。要待風車停定後才可離開，更應避免用手弄停風車，否則想好運都幾難。
5求籤收費劃一
轉完風車，可以求番支籤，在廟內取籤筒需要$20按金，然後走到廟內的求籤區內便可求番支上上籤，至於收費方面，廟內的相士均劃一收費，籤紙一張為$5，解籤費為$10，唔會因為車公誕而坐地起價！
揀啱吉時行靚運
雖然話只要誠心，任何時辰去拜車公都得，不過揀啱吉時的話更可以加強運勢，究竟今日邊幾個時辰最啱祈福呢？楊天命師傅透露，由於今日與肖馬者相沖，所以各位馬仔馬女不宜今日拜車公，應於初三前往，其他人則於吉時祈拜便可。
揀啱方位願望特別靈
除咗揀啱吉時去拜車公之外，楊師傅教各位善信，不妨向住今年各飛星的方位祈福，效果會事半功倍，願望特別靈驗。如果各位唔想俾人炒、想旺財，或者想搵番個如意郎君的話，不妨參考一吓。
失業者搵工方位
此外，若失業者想快啲搵到一份文職工作的話，不妨向着西南方位祈拜；若想找藍領工作則應向東南方位，拜啱自然有好運來。
正東正南避之則吉
不過拜時拜，楊師傅話千祈唔好向住位於正東，代表疾病的五黃星祈拜；此外，正南方的太歲星亦應避之則吉。
揀啱願望易成真
原來某些生肖許某些願望會特別靈驗，對啱方位，效果更加滿意。不過屬雞、鼠、豬的朋友就要留意，由於你哋今年有粒破財星，所以最好對住財位許願，將破財力量減至最低，至於其他生肖則無乜所謂，不過近年個個都求財，梗係拜財位啦！
現於大圍的車公廟，建於明朝末年，傳聞明末崇禎年間，新界各地均出現疫症，當時的村民發現在史書上發現宋朝有位車大元帥，不但平賊有功，其所到之處，疫症亦立即停止，因此他們便塑造了車大元帥的塑像，以鎮疫症，當廟起好後，疫症果然停止，所以建廟至今，一直甚受善信歡迎，香火亦特別鼎盛。
初二、初三開放時間
初二上午七時至下午五時三十分
初二晚上十一時至初三下午五時三十分
交通：於大圍火車站沿指示步行約十五分鐘
1）拜車公最好避免帶肉食，因為肉食有違佛家講求清心之道，要帶食物供奉車公，最好選擇水果、齋菜之類的食物。
2）廟內嚴禁自行燒衣及燒元寶，若你堅持要燒衣的話，應將之放在衣紙收集車內，等廟內的工作人員集體焚燒。廟內負責人話，其實幾炷清香已經能充分表達自己的心意。
很多善信一直以為初三是車公誕，其實今日才是車公誕的正日，只不過因為初三為「赤口」，不宜拜年，所以善信往往揀初三去拜車公轉吓運。