噚日賀歲盃頭尾場都有烏龍事件，先係頭場「洪斯之戰」，洪都拉斯先入波，場內廣播搞錯咗話斯洛文尼亞入波。尾場港聯末段以哥連斯替羅繼華，點知第四球證黃寶安自以為哥連斯係替受傷離場治理嘅基夫，教練曾偉忠見搞錯咗，即刻同場監投訴，過咗三分鐘先將阿雞換番離場，認真搞笑。
今年嘉士伯盃賀歲波有中國同斯洛文尼亞兩支決賽周球隊，噚日就吸引到兩萬六千幾球迷入場，場面尚算熱鬧，尾場「中港之戰」球迷不斷拍打贊助商派嘅吹氣棒，又玩埋人浪，增添咗唔少過年嘅熱鬧氣氛，港聯喺初四嘅決賽對洪都拉斯，入場數字應該更多，足總高層應飲得杯落。
好日都唔去球場睇波嘅足總永遠榮譽會長霍英東博士，噚日諗住親身到場為自己支持嘅中國隊打氣，點知中國班大帝又唔爭氣，九十分鐘搞唔掂港聯，重喺互射十二碼輸埋㖭，搞到勁無癮。家吓中國隊入唔到決賽，唔知佢老人家年初四嗰日會唔會重去大球場捧場呢？