伍詠薇和夫婿練海棠結婚兩年多，計劃馬年努力造人。為了達成願望，伍詠薇日前到山頂一遊，希望摸完凌霄閣奇趣館門外的一對「非洲搞出人命雕像」，可以早日添個馬年BB。
伍詠薇（伍姑娘）和夫婿練海棠結婚兩年多，二人去年計劃今年添丁，為了夢想成真，伍詠薇日前找來新城娛樂台節目《生活好國度》主持鄭啟泰作伴，一同往山頂，摸一摸「非洲搞出人命雕像」。
據悉一摸「非洲搞出人命雕像」便會有喜，伍姑娘摸完又摸，她說：「唔知係咪咁靈，我老公真係好想我有BB。屋企嘅老人家好想我第一胎生仔，不過我唔會特別強求，我認為應順其自然，呢啲嘢真係冇得迫！我哋婚後已經好努力，希望今年可以生個馬仔。」
今次重遊山頂，勾起伍姑娘不少舊日回憶，她說：「我以前成日嚟呢度同啲男仔約會，感覺好浪漫。」當年練海棠追求伍姑娘時，二人可曾到過山頂約會？她說：「咁又未試過喎，我哋最常去嘅係中環，去飲咖啡，我老公最鍾意歎咖啡。」
明日是情人節，一向浪漫的伍姑娘又會為老公安排甚麼節目？她說：「情人節我要做節目，收工之後我會同老公去九龍城食飯慶祝。」前年的情人節，伍姑娘與老公在日本度過，她說：「嗰年我去嗰邊做嘢，佢特別飛過嚟，重買咗紮玫瑰花擺喺我間酒店房嘅牀頭，我哋重一齊飲酒慶祝，我覺得好冧。」
採訪：陳儀敏 攝影：羅德光
場地提供：山頂凌霄閣、PeakLookout