農曆新年期間，好多舖頭都會休番一兩日，而近年勁Hit嘅CyberCafe亦唔例外，所以筆者今日特別搜羅咗多間喺農曆年期間，都照常營業嘅Hit場畀大家。不過打還打，最緊要知道開放時間同埋有冇特別收費（因為有啲舖頭會加收費用），所以知清楚啲，可以幫你慳番唔少利是錢！
記者：馮彥彰 攝影：Alex
ImageGirl：Suki、Vivian
CyberCafe新年特別旺
有不少CyberCafe老闆，都幾睇好今年個農曆新年檔期，事關每年呢個時候，好多食肆都會加二、加三（甚至特別價），至於喺CyberCafe入面有得食又有得玩，雖然少部分商戶會約略加少少，不過大勢都係唔加價，所以可能吸引到呢類喜歡周圍蒲嘅人。
旺角區
勁派利是最多着數
網絡天地今個新年真係多嘢搞，最搞鬼係佢大玩打機代用劵利是（由$5至$30不等），如果一個好彩俾你抽中，隨時唔使錢打機。
除咗打機之外，呢度重有電視、VCD、漫畫同香港雜誌睇，而且新年期間，全場並無任何附加收費，平均每個鐘十蚊左右，飲品食物五蚊起有交易，打到年初十都冇問題！
電話：23881963
地址：旺角洗衣街金雞廣場26樓
附註：無附加費、24小時營業，新年期間有免費入會費優惠。
如果你去CyberCafe真係為咗打機，咁就一定要去呢度逛一逛，呢個場啲《Rainbow6》高手如雲（聽講負責人亞Paul就係其中之一，見到佢記得向佢開槍！）。新年照樣24小時營業，每小時收費$18（包有一杯飲品），真係隨時平過去茶餐廳。
電話：23885638
地址：旺角花園街18號花園閣一至二樓
附註：無附加費、24小時營業、任食餅乾、每小時約$18。
香港區
器材好勁多位
由台灣開到嚟香港嘅戰略高手，都可算係CyberCafe中嘅老字號，全場有152個位，相信唔夠位情況會比較少出現，而且每個座位之間都留有好多空間，再加上強勁嘅音響設施，喺度打機分外舒適，加上呢度重有三文治同餅乾醫肚，真係打成日唔願走！
電話：21551979
地址：香港銅鑼灣駱克道銅鑼灣廣場二期地庫
附註：無附加費，24小時營業，每小時約$12至$16。
近地鐵夠方便
隔籬就係灣仔188，又近銅鑼灣地鐵站，可以睇完戲買完玩具，就同班朋友去開戰。至於網吧入面，就超過二千呎，乜嘢最新電腦遊戲都有齊，而且燈光適中，黑黑哋特別有Feel。呢間舖高手都唔少，尤其係玩《CS》，係練功必到之地！
電話：28916822
地址：灣仔灣仔道220號地下
附註：每小時收費$10-$15。
好多人去CyberCafe，多數都會玩《Rainbow6》同《Counter-Strike》呢類大路Game，不過新年時節，如果淨係打打殺殺，好似唔係咁好意頭，而以下幾款新Game，都係CyberCafe人員嘅專業推介，去到記得玩吓！
《麻雀三缺一2002》熱鬧搞笑開枱過年
熱熱鬧鬧開年，點少得賭兩手，呢隻網上版《麻雀三缺一2002》，除咗可以連線玩外，就算係單打，都可以搵名人明星嚟「戥腳」，非常鬼馬。
過癮動作解謎FlashGame
FlashGame，都係消磨時間熱門之選，當中最出名嘅ultraflash300！內裏有大量不同嘅動作及解謎遊戲，兼且有中文介面，大家一定啱玩！
網址：
網上打牌鋤D乜都有
中國人過新年，真係離唔開個賭字，近期熱門嘅打「牌」網站，真係要講吓呢個Cycgame，裏面有啤牌類嘅鋤大D、十三張及沙蟹等，而打牌類則有台灣16張、香港麻雀等，而且呢度打「牌」完全唔涉及金錢，可免傷和氣。
網址：
聲畫夠熱鬧百萬富翁
雖然電視上嘅《百萬富翁》已經做完，但上CyberCafe時都可以不時聽到佢哋啲主題音樂，事關重有大把人鍾意玩，一來貪佢聲效同畫面夠晒熱鬧，而且新正頭玩《百萬富翁》，特別好意頭！