唔知大家為情人節準備好節目未？情人節，有情人嘅自然要諗，冇情人嘅更加要諗，要諗吓匿喺邊處先唔會俾人發現。好彩今年嘅情人節係假期，唔使返工喺公司俾人問長問短，女士們又唔使鬥花多，男士們慳番好多。
至於有情人嘅朋友們，今年情人節可以轉吓口味，唔送玫瑰花，改為送桃花、水仙或者成盆桔捧去情人屋企，睇吓會唔會俾人鬧。衣着方面可以以唐裝及旗袍為主，着到大紅大紫咁食一個浪漫晚餐。唔一定要去食西餐鋸扒，不妨考慮吓去元朗食盆菜或者去大嶼山寶蓮寺食齋，洋燭則可能要自備。試想想在情人節，一對情侶着到大紅大紫、簪花掛紅，在佛門聖地享受燭光齋菜晚餐，在一片敲經念佛聲中，你夾一箸髮菜畀我，我夾一片冬菇畀你，那是何等的羅曼蒂克與好意頭。
今年的情人節正值是初三赤口，一名女伴多如走馬燈的好友已作定演講辭，他對所有女友們說道他已翻查過「蘇民峰」、「楊天命」與「李居明」的馬年運程書，如果情侶在赤口的情人節相見，定必會引致一個運滯年、相嗌唔好口、見面如見冤家、雙方黑口黑面年頭到年尾云云。
過年流流講埋啲咁嘢確係大吉利是，但如果你又係一個花心的人，咁冇辦法，睇吓使唔使參考吓我朋友呢段演講辭，過一個無良的赤口情人節。