昨日年初一嘅稿，一早要交定，交完之後，收到岑寶桂（桂姐）嘅壬午年經濟大勢預測。一位讀者好心水清，過年前寫張電郵嚟，要求左丁山代他問問桂姐，壬午年點睇：於是左丁山托老友記阿強哥仔代轉。桂姐好唔話得，傳真兩張紙嚟，左丁山抄晒就會呃稿費，所以擇其精要，俾各位讀者參考。桂姐係易經卜筮專家，著有《卜筮今論》，為各方重視。
美國流年經濟：卦象顯示未見任何復甦跡象，經濟會更加洩氣，加上流年位處太歲位，但持兄爻，有失財之像，將陷入艱難期。
中國流年經濟：入世之後，人人都抱有期望，但卦象顯示會有來自其他國家嘅阻礙及刑剋，影響中國經濟發展，大體不如去年。
日本流年經濟：日圓滙價近來大幅下調，易卦顯示來年日本經濟可望自谷底反彈。
香港流年經濟：本港處於福德位，對市場有利，但受外圍影響，不由自主，股市要待秋季才進入恢復期，冬季後漸趨穩定，但全年升幅不會太大。地產方面，交投量增加，但難成炒風氣候，樓價亦不會大幅上揚，用家於夏季較適宜入市，切忌炒賣。
以上各點，乃係卜卦專家桂姐之言，各位唔知啱唔啱聽？一句講晒，就係來年仍係牛皮之局，上半年靠軟，下半年靠穩，大家唔好過分進取，要步步為營。