新年伊始，今日係馬年嘅大年初一，首先代表《車天車地》版仝人，恭祝各位讀者馬年好運，龍馬精神。喺剛過去嘅蛇年，對唔少香港人嚟講，可謂係波折重重，唔少人加入失業大軍之餘，更甚者重淪為負資產一族，咁大起大落嘅市況，確實令人有喘不過氣嘅感覺，究竟踏入壬午（馬）年，香港車迷又有甚麼值得注意嘅地方，可以逢凶化吉呢？我哋特別搵來堪輿大師麥玲玲，為各位讀者講解一下十二生肖喺今年嘅幸運指數、顏色同車款選擇，好等大家有點依據嘛！
記者、攝影：陳偉林
堪輿大師麥玲玲
著名堪輿大師麥玲玲認為，雖然各人所屬生肖，喺馬年嘅運程都各有不同，但凡事只要小心為上，便可將發生問題嘅機會減至最低。
屬馬者今年犯太歲，要小心身體健康狀況，手腳容易有受傷機會；但今年會有較多出門，對交通狀況要格外小心。屬馬之人利「1」或「5」字嘅車牌；而白色及淺藍色車會較有利，新車選擇則適宜家庭車類別。
Camry有乜好：新款Camry有最新GOA防撞規格，乘坐舒適性能卓悅之餘，設備又見齊全，用作代步可謂適合不過。
屬羊者今年財運佳，有升職加薪嘅機會，若然想換車或買新車，可謂最適宜。屬羊之人利「5」或「8」字嘅車牌，而黃色及杏色車會較適合，新車選擇不妨考慮歐洲車出品。
3系有乜好：Facelifted新版寶馬3系樣靚之餘，重係德國一線車款選擇，性能出眾兼有上佳嘅保護性；加上近期車價下調，可謂係換車嘅好時機㗎。
屬猴者今年有多出門公幹嘅機會，看似勞碌辛苦，實則有利運財。屬猴之人利「6」或「7」字嘅車牌，而金色、銀色及白色車則會較切合運程，而新車亦不妨選擇SUV型號。
RX300有乜好：既有豪華轎車享受，又具備有四驅越野車嘅全面性能，可謂動靜皆宜。
要搵可靠車行
屬雞者今年財星拱照，男士們應把握機會，或許能如願以償抱得美人歸㖭！為雞者利見「7」及「8」字嘅車牌，而米色及黃色車會更有利，選購新車時則要搵可靠車行，以免被人欺騙。
Soarer有乜好：豐田Soarer加埋一套大包圍，有型又有款，揸出街必能惹來豔羨目光。
屬狗者今年搵錢順利，但難以聚財，年中或有失竊機會，每事要多加小心。肖狗者利見「3」同「9」字車牌，車身色宜鮮紅或橙色，以及不宜選購貴價車，並以K-Car代步最適宜。
Jazz有乜好：外形時尚顏色奪目，性能出眾代步至為合意，加上唔到11萬嘅車價，更係佢嘅賣點所在。
屬豬者今年碰着破財星，容易招惹交通意外；肖豬者利「1」同「6」字車牌，車身色調宜揀選淺藍色或淺灰色，而新車則要選擇一啲可靠安全嘅車款。
S60有乜好：富豪汽車出名穩紮安全，而S60對乘客嘅保護力強之餘，性能亦見表現出色，難怪佢會咁受歡迎啦。
屬蛇者今年運程不錯，惟跟上司或下屬難溝通，會有阻滯；利見「3」及「4」字車牌，顏色宜揀紅及啡色。不宜買高級轎車，買小車代步至為適宜。
Dunk有乜好：K-Car之中具備Turbo高性能一面，既啱日常代步之用，跑番轉亦可。
屬龍者今年有偏財運，可投資股市或基金，惟不宜炒賣樓房。有利「8」及「9」字車牌，車身色宜為米色、杏色同藍色，兼且亦適宜選擇歐洲轎車。
A4有乜好：新款A4普及受追捧，當中Multitronic半自動波箱，最啱日理萬機嘅用家需要㖭。
屬兔者今年事事順利，但會有較多應酬機會；利見「3」同「4」字車牌，顏色宜選擇淺藍及淺綠色，買車則可揀選跑車一類。
Boxster有乜好：出自跑車世家，車迷有認同感之餘，性能出眾又易操控，可謂深入民心。
揸開篷跑車最寫意
屬虎者今年事事順景，惟桃花盛易吸引異性之餘，亦容易招惹麻煩；利見「1」及「3」字車牌，顏色則可考慮米色同淺藍色，而買車則可選擇Roadster開篷雙座位車。
MiataRoadster有乜好：雙座位小跑車有型又入時，閒來載同女友遊車河就最適合不過。
屬牛者今年事業繁忙，既有擴張嘅機會，又有搬遷嘅可能；利見「2」同「8」字車牌，顏色宜選擇鮮紅及橙色，買車則不妨考慮旅行車款。
Legacy旅行車有乜好：車廂寬敞好用之外，一套恒式四驅操控容易又安全，好啱多走動嘅人士需要。
屬鼠者今年犯太歲，處事小心之餘，更加不宜開快車，免招損失。有利數字為「1」及「6」，而車身顏色則宜選白色及淺綠色，而買車則宜選購家庭MPV車類。
Prairie有乜好：呢部中型七人車有型又有款，趟門設計上落又方便，兼且係潮流之選㖭。