恭喜發財，今日馬年年初一，謹祝大家馬年行好運、馬運亨通、龍馬精神。渣打銀行今年啲利是封好靚，封面題字係「駿馬奔騰」，意頭甚好，希望今年人人奮發，齊齊向前，與香港一起衝刺，勢如萬馬奔騰。
學理上，二月四日早上八時二十四分乃係立春之日，壬午年之始，新年嘅八字係壬午年、壬寅月、癸卯日、丙辰時，八柱之中，含三水（壬壬癸）、二火（午丙），二木（寅卯）、一土（辰）、獨缺金，即係五行缺金。午屬馬，故係馬年，立春日係癸卯日，癸日元（癸）屬水，今年呢隻馬係水馬，馬在水上，雖然識游水，都怕好難游得遠，或用賽馬術語，馬在水上跑，即係今年呢隻馬係軟爛地馬，見水即生。
可惜嘅係，立春日缺金，而金生水，缺金喎，癸水無源，更有丙火，午火暖之焙之，丙火有乾木（寅）為根，愈燒愈旺，水易蒸發，容乜易水乾呀，所以今年屬水之行業，要戒急用忍，守吓至得，守到幾時呢，大約在秋季，農曆七、八、九月屬秋，分別係戊申月、己酉月、庚戌月，冬季之始十月係辛亥月、申酉、庚、辛屬金可生水，呢四個月即陽曆八至十一月，癸水有投，按此推論，屆時經濟可以反彈。經濟學家話美國第一季停止衰退，第二季開始復甦，美國好，香港先至好，香港喺第三季翻生，已合乎八字推理。左丁山才疏學淺，講錯大家唔好見怪。