昨日係蛇年最後一日，唔係個個打工仔都可以歲晚收爐，喺年三十早啲返屋企食團年飯。八方知道，喺政府眾多局長當中，有三個局長噚日就請咗假，包括工商局局長周德熙、公務員事務局局長王永平同埋保安局局長葉劉淑儀。葉劉淑儀重請咗一個禮拜大假度歲，王永平噚日亦請咗半日假；至於其他局長，噚日都忙緊開會，唔知可否準時收工㖭。
財經事務局局長葉澍堃就喺年三十晚先學人大掃除，佢同八方講，難得噚日冇人搵佢，可以靜靜地收拾番過去冇時間做嘅手尾。而工務局局長李承仕就真係唔話得，一早就叫秘書放工先，剩番佢一個人喺辦公室睇文件，佢話一樣會六、七點收工，但係就唔會拎嘢返屋企做，事關要食團年飯。如果太座有興趣，重會去維園行花市。經濟局局長李淑儀六點三放工，比平時放早咗兩、三個鐘，返屋企同媽媽、妹妹團年。
公務員工會聯合會主席梁籌庭話，每逢冬至同年三十晚兩日，公務員都可以早走兩個鐘，部門主管多數批准。但八方心諗，最高層嘅阿頭，返工又係做嘢，放工又係做嘢，邊有假期呢回事，可以同屋企人食到餐飯，已經好幸福啦！
E-mail：